2012/12/23

3-Angels (A Movie Poster Design)


(විශාල කර බැලීමට පින්තූරය මත ක්ලික් කරන්න)
Used Adobe Photoshop CS3


Source Files







2012/11/30

My Photo Manipulation - 01

(විශාල කර බැලීමට රූපය මත ක්ලික් කරන්න)
Used Adobe Photoshop CS3


Source Files




2012/09/12

වළාකුලින්

2012/09/05

Spooky Mulder



2012/08/16

මාගේ පුතුට මල්



මනෝහාරී! චූටි කාලේ නොවරදවා බලපු රූපවාහිනී වැඩසටහනක්! මගේ අම්මා සහ තාත්තා මට හුරු කරලා තිබුණේ ඒ වගේ ඒවා බලන්න! අනික් අතට ඒ ජාතික රූපවාහිනියේ ස්වර්ණමය යුගය විදිහටයි මට හිතෙන්නේ! වෙනත් වානිජ නාලිකා තිබුනෙත් නෑ! ඒක නිසා හරසුන් වැඩසටහන් පෙන්නලා ප්‍රේක්ෂකයෝ ඇදගන්නට තරඟ කරන්න, ජාතික රූපවාහිනියට ප්‍රතිවාදීන් හිටියෙත් නෑ! හරවත් වැඩසටහන් නරඹනවා හැරෙන්නට විකල්ප අපට තිබුනෙත් නැහැ! දැන හෝ නොදැන අපි ඒ වගේ වැඩසටහන් බලලා වටිනා දෑ උකහා ගත්තා!

පුංචි බබා චිත්‍රපටයේ එන "මාගේ පුතුට මල්" ගීතය, සිසිර සේනාරත්නයන් විසින් මනෝහාරී වැඩසටහනේ ගායනා කල අයුරු මට කවදාවත් අමතක නොවෙන දර්ශණයක්! ඔහු ගීතය ගයන අතරේදීම ප්‍රේක්ෂකාගාරය අතර සිටි පුංචි හුරතල් දරුවෙකු අතින් අල්ලාගෙන වේදිකාව මතට ඒම, එදවස පුංචි මට දැණුනේ වීරකමක් විදිහට! ඒ හරහා මං ඒ ගීතයට ආසා කලා! ඒත් මට ගීතයේ තේරුම දැණුනේ නෑ! අම්මාගෙන් අසා එහි අරුත දැනගැනීමෙන් පුංචි මම ගොඩක් සංවේදී වුණා! සිසිර සේනාරත්නයන් පියා හැටියටත්, ප්‍රේක්ෂකාගාරයේ සිට කැඳවාගෙන ආ දරුවා මව අහිමි දරුවා විදිහටත් මට ඒ මොහොතේදී දැණුනේ! පසුව ඒ ගීතය ජාතික රූපවාහිනිය තුල නැවත නැවත විකාශණය වෙද්දීත් මට ඒ සංවේදී හැඟීම දැණුනා! කාලෙකට පස්සේ අද, මමත් නදියාත් සිදුකල දුරකතන සංවාදයක දී මේ ගීතය ගැන කතාබහක් මතු වීම හරහා නිකමට වගෙයි මම යූටියුබය තුල සෙවීමක් කලේ! පැරණි සංවේදී මතකයක් අලුත් කරමින්, එදා මනෝහාරී වේදිකාවේ දී සිසිර සේනාරත්නයන් විසින් ගැයූ ගීයම සෙවීම් ප්‍රතිඵල තුල දැකීමෙන් මගෙ හිතට ලොකු සතුටක් දැණුනා! පැරණි මතක හරි ප්‍රබලයි! ඒ මතක, කුඩා කාලයේ සිටම පැවත එන ඒවා නම්, ඒ ප්‍රබලත්වය තවත් වැඩියි! අද, දස හතාවකට වඩා ඇසුවා ගීතය! තවත් අසාවි!

2012 අගෝස්තු 16

හේතුවක්


පෙරේදත් මෙඅයුරින්
බැලු හෙයින් මිනිස් රැල
ඊයේ ද මෙඅයුරින්
බැලුවෝය මිනිස් රැල

ඊයේත් මෙඅයුරින්
බැලු හෙයින් මිනිස් රැල
අද ද මේ අයුරින්ම
බලති මේ මිනිස් රැල

අදත් මේ අයුරින්ම
බැලු හෙයින් මිනිස් රැල
හෙට ද මේ අයුරින්ම
බලනු ඇත මිනිස් රැල


2012 අගෝස්තු 16

මූණු


හොඳට කල්පනා කරන්න!
ඔයාට මතකද මගේ මූණ?
මවාගන්න පුළුවන්ද මගේ මූණ?
හොඳට?
ඇත්තම කියන්නම්!
මට නම් මතක නෑ ඔයාගේ මූණ!
ඒ ඔයා ගැන ගානක් නැති හින්දා නෙවෙයි!
අපි ගොඩක්ම ආදරේ කරන අයගෙ මූණු අච්චු, අපේ හිතේ හිටින්නෙ නෑ!
ඔයාව මට හැමදාම හම්බවුණත්, ගෙදර ආවාම මට මවාගන්න අමාරුයි ඔයාව!
ඒකයි මං මගේ වෝල් පේපරේ ඔයාට බාරදීලා තියෙන්නේ!
හිතන්න!
මහින්දගෙ මූණ?
රනිල්ගෙ මූණ?
චන්ද්‍රිකාගේ මූණ?
ඔයාට හොඳට මැවිලා පේනවා නේද ඒ මූණු?
හැම පුංචි විස්තරයක්ම සහිතව?
මහින්දගේ කපටි පොලු රැවුල!
රනිල්ගේ ගෑණු හිනාව?
චන්ද්‍රිකාගේ කුණුකමේ පෙනුම තවත් වැඩි කරපු වපර ඇහැ!
මේ ඔක්කොම ඔයාට මැවිලා පේනවා නේද?
දැන් ආපහු මවන්න මගේ මූණ!
ඔට්ටුයි රත්තරන්!
ඔයාට මගේ මූණ හරියට මවන්න බෑ!
මට ඒක කියන්න ලැජ්ජා වෙන්න එපා!
මං දන්නවා!
ඒක හොඳ සාක්ෂියක් ඔයාගෙ ආදරේ මනින්න!

2012 අගෝස්තු 15

2012/07/30

A Kiss


A Kiss
Composed By Sahan Padmasangkha Peiris

2012/07/28

Why This kolaveri Di (Cover)


.

2012/07/11

එකොලහ




කොලහ ගැන දන්නව ද? හ්ම්! ඇත්තටම ඒක හුඟක් අය දන්නෙ නෑ! එකමත් එක කාලෙක, මේ වගේම ජූලි එකොලොස් වෙනිදාවක් ආවා! එදා උදේ වෙන තුරුම සියුම් මල් සුවඳකින් මගේ නාස් කුහර පිරිලයි තිබුණේ! ඇස් වලට පෙනුනේ නැවුම්ම නැවුම් හිරු කිරණ විතරයි! හිත තිබුනේ හැම වෙලාවෙම නුවර වැවේ ගිණිකොන කෙලවරක තිබුණු ඉස්කෝලෙක! ඒකෙ කෙල්ලන් කොච්චර හිටියත්, හිටියේ එකම එක කුමාරිකාවක් විතරයි! ඒ තමයි කැන්ඩ්ලීනා කුමරිය! සුරංගනා ලෝකේ දන්නව ද? මනුස්ස ලෝකේ මනුස්ස වේසෙන් මාව හොයන්න ඉපදෙන්න කලින්, එයා හිටියේ අර මං කිව්ව සුරංගනා ලෝකේ තමයි! ඒ කාලේ එයාට තටු තිබුණා! ඒත්, මාව හොයාගෙන මිනිස් වෙසින් ඉපදෙද්දි, එයාට සිද්ධවුණා ඒවා අමතක කරන්න! ඒ වුණත්, එයා සම්පූර්ණ මිනිස් වේසෙන් නෙවෙයි හිටියේ! ප්‍රධානම වෙනස වුනේ මේකයි! කුමාරි හැදුනේ වයිට් ගෝල්ඩ් සහ "හොඳ" කියන අමුද්‍රව්‍ය දෙකින්!

මං මේ දොඩවන්නේ එකොලහ ගැන නෙවෙයි කියලා හිතෙනව නේද? කතාව ඔක්කොම අහන්නකෝ! මෙහෙමයි! වයිට් ගෝල්ඩ් වලින් සහ "හොඳ" වලින් හැදුනට මොකද, කැන්ඩ්ලීනා කුමාරිගේ මොලේට තිබුනේ ලස්සන රෝස පාටක්! මාව හොයාගෙන ආපු එයාගේ ගමනේ එකම පරමාර්ථය වුනේ මාව හොයාගැනීමම වුණාට, සුරංගනා කුමාරියෙකුගේ ඉඳලා මිනිස් කුමාරියක් බවට පත් වුණු රූපාන්තරනයේදී, එයාගේ රෝස මොලේට ඉදිකටු සීයක් විතර ඇණුනා! ඒවා ඇන්නේ කවුද කියලා නිශ්චිත අදහසක් මට නෑ! කොහොම උනත් එක ජූනියක මුල එයා අහම්බෙන් මාව දැක්කා! ඊට හය අවුරුද්දකට විතර පස්සේ එලඹිච්ච ජනවාරියක එයා මාව හොයා ගත්තා! එතකොට  එකොලහ?

මං කිව්වෙ? එයාගෙ තටු දෙක හැලිලයි තිබුනේ! ඒ වුණාට පුදුමාකාරම කාරණය මොකද්ද දන්නවද? මිනිස් කොල්ලෙක් වෙච්චි මගේ පිටේ ලොකු තටු දෙකක් වැවෙමින් තිබුණා! මං පස්සේ  කාලෙක තමයි දැනගත්තේ ඒ ඇයි කියලා! ඒක වෙනනම කතාවක්! මට මතක විදිහට මං දවසක් ඒ කතාව යාන්තමට කිව්වා! ආයෙමත් කියන්න බෑ ඉතින්! කතා ගොඩක් එක පාර කිව්වම එපා වෙන්න පුලුවන්නේ! ඒක හින්දා ඒක ආයෙම නොකියා ඉන්නම්‍! හරි! කුමාරිට තටු තිබුණේ නැහැ! ඒ වුණත් එයා පියාඔන්න හැදුවා! ඇත්තටම එයා එහෙම කලේ මං හින්දයි! මමයි එයාට කිව්වේ මගෙත් එක්ක ඉගිල්ලිලා යමු කියලා! පවු! ඒ දවස්වල එයා පියාඹන්න ගත්තු උත්සාහය ගැන දන්නේ මං විතරයි! කොච්චර දැඟලුවත් එයාගේ තටු දෙක ආපහු වැඩුනෙ නෑ! තටු නැතුව වුනත් එයා පියාඹන්න උත්සහ කලා දිගටම!

වැඩේ ඔන්න ඔහොම යද්දි තමයි අර මූසල එකොලොස්වෙනිදාව ආවෙ! වෙනදා වගේම එදාත් කුමාරි පියාඹන්න උත්සහ දරමින් හිටියා! ඒත්... පියාඹන්න දරන උත්සාහයේ පීඩනය, එයාගේ රෝස පාට මො‍ලයට තව දුරටත් දරාගන්න බැරිවුණා! එක පාරටම එයාගේ මොලේට වැදිලා තිබුණු ඉදිකටු වලින් කොටසක් ගැලවිලා හතර අතට විසිවෙන්න ගත්තා! මං හිතුවෙ නෑ ඒකෙන් ලොකු හානියක් වෙයි කියලා! ඒ වුණත්, වෙච්චි දේ ගැන මට හිතාගන්නවත් බැරි වුණා! ඉදිකටුවක් විසිවෙලා ගිහින් අහසේ දිලි දිලි තිබ්බ ඉරේ ඇනුණා! එච්චරමයි! ඉර එක පාරට නිවිලා ගියා! මං බය වුණා හුඟක්! ලෝකෙම පට්ට අඳුරෙ ගිලුණා! මට මොකුත්ම පෙණුනේ නෑ! මාසයක් දෙකක් තුනක් යද්දී මං තේරුම් ගත්තා ඇත්තටම වෙලා ති‍යෙන දෙය, මං හිතාගෙන හිතපු දෙයට වඩා ගොඩක් වෙනස් බව! එදා ඉදිකටු ප්‍රහාරයෙන් ඉරට කිසිම දෙයක් වෙලා තිබුනේ නෑ! ඉතින් හිතාගන්න පුලුවන්ද මට මොකුත් නොපෙනුනේ ඇයි කියලා? ඒ ඉදිකටු වැදිලා තිබුනේ මගෙ ඇස් දෙකට! මම අන්ධ වෙලා!

මං අන්ධ වුණා කියලා දැනගත්තු වෙලේ මගෙ හිතට දැණුන වේදනාව  කියලා නිම කරන්න බැරි තරම්! ඒ වෙන මොකවත් හින්දා නෙවෙයි! මට ආපහු කවදාවත් කැන්ඩ්ලීනා කුමාරිගෙ වයිට් ගොල්ඩ් මුහුණ බලාගන්න බැරි වෙන බව දැණුන හින්දා! ඒත් මට කරන්න කිසිම දෙයක් තිබුනේ නෑ! කුමාරිකාවත් හිටියේ හොඳ සෞඛ්‍යකින් නෙවෙයි!

හැබැයි ඔන්න, දෛවය මට පන්න පන්න ගැහුවෙ නෑ! තවත් මාස ගාණක් යද්දි කැන්ඩ්ලීනා කුමාරිගේ රෝස මොලේ ඉදිකටු ගැලවුණු තුවාල සිදුරු සුව වෙන්න පටන්ගත්තා! ඒත් එක්කම එයාට පියවි සිහිය ටික ටික ආවා! සම්පූර්නෙන්ම ඒ තුවාල හොඳ වෙද්දී, එයා මාව හොයාගෙන ආවා! හ්ම්! මං අන්ධ වෙලානේ ඒ වුණාට! ඒත්, අපි දෙන්නගෙම වාසනාවට සුරංගනා ලෝකෙදි එයා ලඟ තිබුණු අරුම පුදුම හැකියා වලින් කිහිපයක්, තුවාල හොඳවීමත් එක්කම ආපහු එයාගෙ ආත්මයට දැනෙන්න පටන්ගත්තා!

එයා මටත් හොරෙන් මගෙ ගාවට ඇවිත්, එකපාරටම මගෙ ඇස් දෙකේ ඇනුණු ඉදිකටු දෙක ඇදලා ගත්තා! ඒ වෙලාවෙ රිදුණා තමයි! ඒත් මට සතුටු දැණුනා, මගෙ කුමාරිගෙ අත් දෙකෙන් ඒ වේදනාව වින්ද එකට! කුමාරි ආපහු එයාගේ සිනිදුම සිනිදු අත් දෙක, මගෙ ඇස් වල තුවාල වලට තියලා තද කලා! ඉවසන්න බැරි තරම් වේදනාවක් එක්ක මං කෑගැහුවා! ඒ වේදනාව වින්ද කාලය අදටත් මං දන්නෙ නෑ! අන්තිමට එයා අත් දෙක ඉවතට ගත්තා! ඒත් එක්කම මට පෙණුනේ මගෙ කැන්ඩ්ලීනා කුමාරිගේ දිලිසෙන වයිට් ගෝල්ඩ් මුහුණ! දෙයියනේ එයා මාව සුව කරලා! එදා මාව අන්ධ බවෙන් බේරගත්තා මගේ කුමාරි!

කතාව දික් ගැස්සුනා වැඩිද මන්දා! මගේ එකොලොස්වෙනිදා ගැන කතාව කෙටියෙන් ඔන්න ඔහොමයි! ආ..! මට කියන්න බැරි වුණානේ! මගෙ ඇස් දෙක සුව වෙලා ටික කලක් යද්දී, කැන්ඩ්ලීනා කුමාරිගේ තටු දෙක මතු වුණා! බලන්න එපායැ! අද වෙන කොට එයා හරි අගේට පියාඹනවා! KCC එකට උඩින් ලස්සනම ලස්සන වයිට්ගෝල්ඩ් කුමාරියක් දිලිසි දිලිසි පියාඹන දර්ශනය ගැන හිතාගන්න පුලුවන්ද? නුවර ආපු වෙලාවක පොඩ්ඩක් බලන්න! ඔයාලටත් පෙනෙයි සමහර විට! මේ වෙද්දී රෝස මොලේ ඉදිකටු සම්පූර්ණෙන්ම වගේ අයින් වෙලා ඉවරයි! අපි දෙන්නම එකතු වෙලා ඒවා එකින් එක ගැලෙව්වා! ඒක හින්දා, ආයිමත් දවසක අර වගේ දෙයක් වෙයි කියන බය මගේ හිතේ නෑ! ඒ විශ්වාසය ලොකු සැනසීමක්! මොකද, වින්ද වේදනාව මතක් වෙද්දී තවමත් මගේ සරුවාංගෙම දිය වෙනවා වගේ දැනෙන හින්දා! ඉතින් ආයෙමත් මල් සුවඳින් නාස් කුහර පිරිලා ගිහින්! හැබැයි.. දැන් මං දකින්නේ හිරු එළිය විතරක් නෙවයි! කැන්ඩ්ලීනා කුමාරිගේ වයිට් ගෝල්ඩ් දිස්නේ තමයි මගේ ඇස් දකින මගේ ලෝකේ ලොකුම ආලෝකේ!

2012 ජූලි 11


2012/06/19

මිතුරනි




මිතුරන් වෙයි මේ සියල්ල මාගේ
කෙතරම් දිස්නය ඇති ද මොවුන්
ඔවුනතරින් තනි මොහුගේ රශ්මිය
බලන්න ඔහුගේ සිනහ කැලුම්
අරුණාලෝකය සමඟ තුටින්
උතුරන ඔහුගේ සිනහ කැලුම්

මිතුරනි, මා ප්‍රිය මිතුරනි දැන්
රහසින් මා අමතන්
සවනය යොමු කරවා මම ඉන්නම්
මිතුරනි මා අමතන්
දෙනෙතට දසුනක් නොමැතිව නුඹලා
සිරගත වී සිටි අයුරු දනිම්
අවුරුදු ගණනක් මා සිටි පරිදිම
නුඹලා ලතැවුණු අයුරු දනිම්

බලන්න මා ප්‍රිය මිතුරනි දැන්
මා යලි මගෙ නිවසට ඇවිදින්
නුඹලාගේ සිත් තුල නලියන ඔය
පොරොත්තුවේ නිම් කඩුළු සොයන්
කලකට පෙර අප සිටි පරිදෙන්
බලන්න දැන් අප, අප සමඟින්
මා හා එක් වී හෙට දවසේ දී
නොකරනු නොම වෙද නෙක මහිමන්

මිතුරනි, නිපුණැති මිතුරනි දැන්
වැළඳගනු පිණිස පසැඟිල්ලෙන්
මිතුරනි මසුරත වෙත පැමිණෙන්
උණුසුම ගනු මැන මා අත්ලෙන්
මිතුරනි දිගු සුසුමක් සමඟින්
ගුලි වනු මැන මා අත සවියෙන්

ඉසිඹුලන්න මිතුරනි මාගේ
වකුටුව සිටි අවුරුදු ගණනක්
දිගහරිනෙමි නුඹලා ආයේ
ලඟදිම දවසක ආදරයෙන්
නුඹලා වෙත අසිරිය ගෙන එන්නෙමි
සිහිනෙකවත් නොතිබුණු විලසින්

වාසනා ගුණැති මිතුරනි මාගේ
මාහැඟි රුධිරයෙ සුවඳ සොයන්
රිදී දිස්නයැති මිතුරනි මාගේ
නුඹලාගේ ගත නැඟෙයි ලෙයින්
නුඹලාගේ වත වැසෙයි ලෙයින්

අවසන හිස් බව මැකී ගොසින්
නැවතත් මා අත පිරීගොසින්




"Sweeney Todd" වේදිකා නාට්‍යයේ සහ එම වේදිකා නිර්මාණයට අනුව නිර්මාණය වුණු චිත්‍රපටයේ එන "My Friends" ගීතය ඇසුරිනි. කිසිදු වරදක් නොකල කරණවෑමියෙකු සිරගතව සිට, වසර පහලවකට පසුව පැමිණ, තම පැරණි දැළිපිහි කට්ටලය නැවත තම අතට පත් වීමෙන් පසු ඔහු විසින් ගයන ගීයකි. ඔහු මිතුරන් ලෙස ආමන්ත්‍රණය කරන්නේ ඒ දැලිපිහි වලටයි.
2012 ජුනි 18


2012/06/13

The Moon of Halloween Night!




Adobe Illustrator CS3 මෘදුකාංගය යොදාගෙන කල නිර්මාණයක්!
විශාල කර බැලීමට රූපය මත ක්ලික් කරන්න!
2012 ජූනි 13

2012/05/01

තෙවසරකට පසු



අහම්බෙක දුටුව දා පටන් එක දෙව් දුවක්
එකින් එක හැඩ වුවා සිතේ ඇති හැම කොණක්
දුටු නමුත් ඒ දෙනෙත් යලි යලිත් කී වරක්
දකින හැම වරෙක හිත තුලට දැණුනා යමක්

කිහිප වසරක් ගත වුණත් සිරව මම තවත්
ලය පුපුරනා තරම් පෙම දරනු නෑ සමත්
කාරණා නේක සිතමින් ඉවසමින් හිඳත්
නවතගත නොහැකි විය සිත, සිතුම් තද කලත්

තෙවසරක් එපිට සුබ සිහිනෙක දැවටිලා
වෙසක් මස පලමු දිනයක් එදත් එළඹුනා
බිය සිතේ ඇවිලුනත් පෙම ඊට වැඩි නිසා
මම මගේ හිතේ බර ඇගෙ කනට පැවසුවා

එයින් පසු සෑම දින සිතින් මා ළඟන් හිඳ
මගේ පණ රැහැන් වෙත නුඹෙ ජීව සුසුම් පිඹ
දෙරණ මත පා තබන අයුරු මට කියා දෙන
නුඹ වෙතට මුලු හදින් තුති පුදමි මා සබඳ

සැප මෙන්ම දුක ද නුඹෙගේ බෙදා ගනු පිණිස
මගේ මුලු ජීවිතය කැපව ඇත නුඹ නමට
වේදනා පැමිණියත් කඳුළු දී විටින් විට
දෙසිත එක සිතකි මතු එලඹෙනා සැම දිනෙක


මම අද අත්විඳින සියල්ලම තීරණය වුණු මගේම ප්‍රකාශය මගෙන් පිටවුණේ අද වගේ දවසක!
වෙනත් විදිහකින් කිව්වොත්, මගේ හිතේ මෙතෙක් ඇතිවුණු ‍ප්‍රබලතම හැඟීම වචනයෙන් ඇයට කියලා අදට හරියටම අවුරුදු 3ක්! 
2012 මැයි 01


2012/04/22

සොදුරු සිතැත්තෙකුගේ සමුගැනීම


1946 නොවැම්බර් 02 වැනිදා කුරුණෑගල දිස්ත්‍රික්කයේ කොබෙයිගනේ ප්‍ර‍දේශයේ උපත ලද ජේ. එම්. උපුල් කරුණාරත්න, විද්‍යෝදය සරසවියේ විශේෂවේදී උපාධිධාරියෙක්. ඔහු පාළි හා සංස්කෘත පිළිබද හසල දැණුමැති පුද්ගලයෙක්.

1979 දී ශ්‍රී ලංකා ගුවන් විදුලි සංස්ථාවේ නිවේදකයෙකු වශයෙන් ප්‍රධාන කාර්යාලයට පත්වීමක් ලද උපුල්, 1981 දී ශ්‍රී ලංකාවේ මහවැලි ප්‍රජා ගුවන් විදුලි සේවය ආරම්භ කරද්දී වැඩසටහන් නිෂ්පාදකයෙකු වශයෙන් සම්බන්ධ වුණා. පසුව සංවිධායකවරයෙකු හා පාලකවරයෙකු වශයෙන් ගුවන් විදුලි ක්ෂේත්‍රෙය් ඉදිරියට යමින් අවසානයේ දී ශ්‍රී ලංකාවේ ප්‍රථම ස්ථානගත ප්‍රජා ගුවන් විදුලි මධ්‍යස්ථානය වූ ගිරාදුරුකෝට්ටේ ප්‍රජා ගුවන් විදුලි සේවයේ පාලක වශයෙන් 1998 වසර දක්වාම කටයුතු කලා. ඔහු ගුවන් විදුලියෙන් ස්වේච්ඡාවෙන් විශ්‍රාම ගොස් වසර 14 පමණ ගෙවුණත්, ගිරාදුරුකෝට්ටේ ශ්‍රවණ කලාපයේ අසන්නන් බොහොමයකට උපුල් තවමත් මතකයි.

උපුල් දක්ෂ නිවේදකයෙක්. නිර්මාණාත්මක වැඩසටහන් සම්පාදකවරයෙක්. ප්‍රවීණ කවියෙක් හා ගීත රචකයෙක්. කලාකාමී සහෘදයෙක්. සමන් කුඹුකගේ සංගීතවත් කරලා ටී. එම්. ජයරත්න ගායනා කරන "විහාරයෙන් එන නාමල් සුවදින් හද මල විකසිත වේ" ගීතය ලිව්වේ උපුල්. නමුත්... එතනින් එහාට ජාතික තලයේ දී ඔහුගේ ගීත භාවිත වුණා නම්, ඒ අතලොස්සක්.
රටේ සාමාන්‍යයෙන් සිද්ධ වෙනවා වගේම, උපුල්ගේ හැකියාව, දක්ෂතාව හදුනාගෙන, ඔහුගෙන් සාර්ථක ප්‍රයෝජනයක් ලබන්නට ගුවන් විදුලිය සමත් වුණේ නැහැ. උපුල් කොළඹ හිටියා නම්, රටේම ජනප්‍රිය නිවේදකයෙක්, ගීත රචකයෙක්, ප්‍රසිද්ධ කලා කරුවෙක් වෙන්න තිබුණා. සැබෑ දක්ෂයන්ට ඉඩක් නැති අපේ රටේ, උපුල්ට වුණෙත් ඒ ටිකමයි.

උපුල් අන්තිම කාලයේ දී ජීවත් වුණේ මහනුවර, කුණ්ඩසාලේ, පඩිවත්ත ප්‍ර‍දේශයේ. ඊයේ (21) උපුල් අපෙන් සදහටම සමුගත්තා. උපුල් කරුණාරත්න නම් වූ මේ සුවිශේෂී කලාකරුවාගේ දේහය පිළිබද අවසාන කටයුතු, අද සවස මහයියාව පොදු සුසාන භූමියේ දී සිදු කෙරුණා.
2012 අප්‍රේල් 22

2012/04/17

හිම හොරා!

වෙනදාට උදේ පාන්දරින්ම මූණුපොතට එබුණත් අද එසේ කිරීමට නොහැකි වුණු මට, දුරකතන පණිවිඩයකින් දැනගන්නට ලැබුණේ හරිම පිළිකුල් සහගත දෙයක් පිළිබදව! කවි හොරකමක් ගැන! එසැණින් මම පොඩ්ඩක් බැලුවා කවි පිටු වලට එබිලා! සුදීපා මිහිරි කිවිදියගේ "හිම" නමැති නිර්මාණය, "Sandesa Kavirathna" යන නමින් පෙනී සිටින්නෙකු විසින් හොරකම් කර, කවි පිටු කිහිපයක පල කර ඇති වගයි දැකගන්නට ලැබුණේ! ෆේස්බුක් භාවිත කරලා කවි ලියන බොහෝ දෙනෙක් මේ හොරකමට විරුද්ධව මිහිරි අක්කා වෙනුවෙන් නැගී සිටි අයුරුද දැකගන්නට ලැබුණා!

ඒ අතරේ "මහ කොළඹ කවිය (The City Poem)" පිටුවේ මේ පිළිබදව ඇතිවී තිබුණු සංවාදයේදී අමුතුම දෙයක් දැක්කා! "කවි පුහුලක්" හොරා ගත් හොරෙකු, තමන්ට චෝදනාවක් එල්ලවන්නටත් පෙරම, කර අත ගා පුහුල් අළු පිසදමාගැනීමට ගත් උත්සාහයක් වැනි යමක් පෙනුණා මට! සුදීපා මිහිරි කියන කෙනාව මම හදුනාගත්තේ අද ඊයේ නොවෙයි! මේකෙ ඉන්න ගොඩක් කවි කාරයොත් සුදීපා මිහිරි කියන නම බොහෝ කලක සිට හදුනනවා! ඇගේ නිර්මාණ රසවිදිනවා! නමුත් මා පෙර කී කවි පිටුවේ සිටි ජ්‍යෙශ්ඨ කවියෙකු හැසිරී තිබුණේ, සුදීපා මිහිරි යන වචන දෙක අද ඇසූ පරිද්දෙන්! සැබෑ හොරා, බොහෝ කලක සිට අපට හුරුපුරුදු මිහිරි අක්කාද, එසේත් නැතිනම් අද ඊයේ මතු වුණු ආගන්තුක Sandesa Kavirathna නමැත්තාද යන වග හදුනාගැනීම, පුහුල් හොරාට මහා උභතෝකෝටිකයක් වී තිබුණා! එමෙන්ම ඔහු ලියා තිබූ දේවල් වලින් ව්‍යංගව අදහස් කෙරුණේ "සමහරවිට Sandesa Kavirathnaගේ කවියක් සුදීපා මිහිරි විසින් හොරකම් කලා වීමට පුලුවන් ය" යන අදහස! පැහැදිලි සාධක තිබියදී, සැබෑ කවි හොරා සොයාගැනීම සදහා පුළුල් මෙහෙයුමක් කරන්න සාක්ෂි සොයන උපාසක රහස් පරීක්ෂකයෙකුගේ චරිතයක් ආරූඪ කරගෙන සිටියා ඔහු ඒ වෙලාවේදී!

මිහිරි අක්කාට, වෙනත් සොච්චමි කවියෙකුගේ කවියක් සොරකම් කර, එය තමන්ගේ නමින් පල කිරීමට කිසිම අවශ්‍යතාවක් නැති බව පැහැදිලි කරුණක්! එය, මිහිරි අක්කාගේ කවීත්වයේ දිග පළල දන්නා අප හැමෝටම වැටහෙනවා! මීට පෙර ද කවි හොරකම් මූණුපොත ඇතුලේ දැකලා තියෙනවා උනත්, මේක ඊට වඩා වෙනස් විදිහටයි මං දකින්නේ! සිතාමතාම මිහිරි අක්කාව රිදවා ඇයව වැට්ටීමට ගත්තු උත්සාහයක් විදිහටයි මේක මට පෙණුනේ! එහෙම නැතුව, කෙනෙකු කවියෙක් ලෙස පෙනී සිටින්නට ගත්තු උත්සාහයක් නෙවෙයි! ඒ වගේම මේක කරන්නේ අපි අතරෙම ඉන්න කෙනෙක් කියලත් දැනෙනවා! නොඑසේනම්, තමන්ගේ සැබෑ ප්‍රොෆියිලයෙන් සුදු චරිතයක් මවාපාමින් අප දන්නා හදුනන කෙනෙක්ම ෆේක් ප්‍රොෆියිලයක් භාවිතයෙන් මේ කුමන්ත්‍රණය දියත් කරනවා විය යුතුයි. දිගින් දිගටම මෙහෙම කරද්දී, මිහිරි අක්කා කළකිරී මූණුපොතේ කවි පළකිරීමෙන් ඈත් වේවියි ඔහු සිතනවා ඇති!

මේ නිර්මාණය පලවීම ගැන හෝරා සාක්ෂි ඉල්ලන්නන් වෙනුවෙන් මං පහත සටහන ඉදිරිපත් කරන්නම්! "හිම" නිර්මාණය මා මුලින්ම දුටුවේ ඊයේ හවස මිහිරි අක්කාගේම ප්‍රොෆයිලයේ! එසැණින් මා එයට කොමෙන්ට් කරනු ලැබුවා!

ඈ නිර්මාණය පල කර තිබුණේ සවස 5.09ට! 

ප.ව. 5.38- Sahan Padmasangkha Peiris- කෛලාස කියන්නේ මොනවද අක්කියෝ?

ප.ව. 5.40- Sudeepa Mihiri- හිමාලය කිට්ටුව තියෙන කන්දක් මල්ලි :)

ප.ව. 5.42- Sahan Padmasangkha Peiris- අහ්! තැන්කිව්! !

Sandesa Kavirathna නමින් පෙනී සිටින්නා විසින් මේ නිර්මාණය "මහ කොළඹ කවිය (The City Poem)" පිටුවෙහි පල කල වේලාව ලෙස සටහන් වන්නේ පස්වරු 5.37යි!

මහ කොළඹ කවිය පිටුවෙහි 5.37ට පලවූ කවියටම ඊට විනාඩියකට පසු 5.38ට මා විසින් කොමෙන්ට් කර ඇත්තේ මිහිරි අක්කාගේ ප්‍රොෆයිලය තුලදී!

:)


පසුව මම මේ නිර්මාණය "කලු අහසේ නෑදෑයෝ" පිටුව තුලදීත් දුටුවා! එහි වෙලාව සටහන් වෙන්නේ පස්වරු 5.06 ලෙසින්!

මිහිරි අක්කා විසින් මෙයම "සදැස" පිටුවේද පලකර ඇත්තේ පස්වරු 5.06ටයි!

කෙසේ වෙතත් තමන්ගේ නිර්මාණයක් කොල්ලකෑමට ලක්වූ විට, නිර්මාණකරුවාට හිත් වේදනාවක් දැනීම සාමාන්‍යයි! නමුත් මෙතනදී මිහිරි අක්කා දුක් නොවිය යුත්තේ, ඇයගේ නිර්මාණය විකෘති මානසිකත්වයක් ඇති බූරුවෙකුගේ කොල්ලකෑමකට ලක්වීම ගැන දැන් බොහෝ දෙනා දැණුවත් නිසා යි. අප සියලු දෙනා හදවතින්ම මිහිරි අක්කා සමග සිටිනා නිසායි! එමෙන්ම බොහෝ දෙනා මෙවැනි හොරකම් ගැන අවධානයෙන් සිටීමද හොරකමක් වූ විට නැගී සිටීමද අගය කල යුත්තක්!

දුප්පත් මානසිකත්ව ඇත්තවුන් විසින් නිර්මාණ කොල්ලකෑම කෙසේ වෙතත්, මේ ආකාරයට සැලසුම් සහගතව නිර්මාණකරුවන්ට ඉරිසියා සහිතව වල කපන්නට උත්සහ දරන කුහකයන්ට සැබෑ නිර්මාණ කරුවන් යට විය යුතු නැහැ! නමුත් අපි අවධි මනසින් සිටිය යුතුයි! මක් නිසාද, අප අවට සුදු රෙදි පොරවාගෙන සැරි සරන්නන්ම, වෙස් මුහුණු ගලවා දමා පැමිණ අපගේම බඩට පිහියෙන් ඇණීමට හොදින්ම ඉඩ ඇති නිසා ය. මිහිරි අක්කට අද වුණු දේ හෙට තවත් කෙනෙකුට වෙන්න පුලුවන්!



කඳු මුදුන නුබ සිඹින පරදවන කෛලාස
සුසුදු හිම සළු දරන පතා උණුසුම් පහස 
නොදැන සීතල දවන තවත් ගුලිවෙන රහස 
පහදන්න හැකිවෙයිද හිම කැටයකට කෙලෙස 

මිදුණු දිය බිඳිති තුඩු සරින් නැගි මඳ හාස 
පිපුණු මල් පියල්ලට කිමද ඔය අපහාස 
වසත් හිරු කිරණ මැද වින්ද උණුසුම් පහස 
අමතකව නොව සබඳ සිසිරයෙක තුටු සහස 

ධවල හැම සියල්ලම පිවිතුරුම නැත මිතුර
සම වෙයිද නුඹට අර ගලන නිල් දිය දහර 
පලක් වෙද ඇතත් පොළොවම වසාගෙන නිතර 
පවස නිවනට හැකිද දිය බින්දුවක් විතර 

සිසිරයෙහි මිදුණු වස්සාන මතකය අතර 
පතිත රඹ වන් පතක් මියෙන විට හිම අතර 
සීතලට කීරි ගැහෙනා ගසක අතු පතර 
දුටුවාද සලිත හිම මලක් හිරු දැක නිතර

2012 අප්‍රේල් 17



2012/04/16

Flaming Skull 3


Adobe Photoshop මෘදුකාංගය යොදාගෙන කල නිර්මාණයකි.
විශාල කර බැලීමට පින්තූරය උඩ ක්ලික් කරන්න.

2012 අප්‍රේල් 15


Flaming Skull 2


Adobe Photoshop මෘදුකාංගය යොදාගෙන කල නිර්මාණයකි.
විශාල කර බැලීමට පින්තූරය උඩ ක්ලික් කරන්න.

2012 අප්‍රේල් 15

Flaming Skull 1


Adobe Photoshop මෘදුකාංගය යොදාගෙන කල නිර්මාණයකි.
විශාල කර බැලීමට පින්තූරය උඩ ක්ලික් කරන්න.
2012 අප්‍රේල් 15




2012/03/31

Love is Vengeance

Adobe Photoshop මෘදුකාංගය යොදාගෙන කල නිර්මාණයකි.
විශාල කර බැලීමට පින්තූරය උඩ ක්ලික් කරන්න.

2012/02/01

පොහොට්ටුවේ


පොහොට්ටුවේ මං එනතුරු ඔතනම ඉන්න
වටින් හමන සුලන් තදයි විකසිත වෙන්න
පොහොට්ටුවට හරි වැරැද්දෙ පාර කියන්න
හිඳින්නෙ ඒ වෙනුවෙන් මං විතරයි ඔන්න

පරිස්සමේ යන ගමනෙදි හදින් බලන්න
ඉඩක් තියේ හදිස්සියේ පය පැටලෙන්න
යදම් බැඳන් හිටියත් දෑතම හිරවෙන්න
දෙන්නෙම නෑ කවදාවත් හිතින් වැටෙන්න

සඳුන් සිහින දෑසෙ ගැටෙයි ගිණිකන වෙන්න
අඳුන් තිරෙන් දෑස බැඳෙයි ලොව නොපෙනෙන්න
අතින් නුඹේ දෑත මගේ අල්ලාගන්න
මගේ දෑස හැමදාටම නුඹටයි මෙන්න

ජීවිතයම නුඹේ නමට ලියා තියන්න
නුඹට පිපිය හැකි ලොවකට නුඹව පුදන්න
හිරු තරමට රැකවරණය සෙනෙහස දෙන්න
පුලුවනි ඒ හැම දේ මට විතරයි ඔන්න

2011 ඔක්තෝම්බර් 15


2012/01/22

දෙවසරක්



ලෝතලය මත පිපෙන මල් සැම පිපෙන්නේ කිමදැයි අසා
විමසුවොත් පැනයක් සොබාදම් මෑණිගෙන් මා කෑගසා
නිසැක එසැණම ලැබෙනු ඇත පේලියක් පිළිතුරු මේ ලෙසා
එමල් පිපු‍ණේ පිදෙනු පිණිසැයි නුඹෙ සුමුදු දෙපතුල් වසා

ජීවිතේ තුල ජීවිතේ මඟ කියා දුන් සිතියම නුඹයි
ප්‍රේමයේ සිර අගුළු බිඳ දොර හැරදැමූ සුළඟද නුඹයි
ආකහේ තරු පැරදවූ සිනහවෙන් හද පුබුදන නුඹයි
ලෝකයේ සිය දනන් සිත් මැද එකම සුපහන් සිත නුඹයි

නේක කඩ‍තොළු මැවී කඳුළැලි පැරදුවත් මහ සාගරේ
දෙවසරක කාලයක් වින්දෙමි සුවය ප්‍රේමයෙ ආකරේ
නතර වනතුරු කෙදින හෝ අප සංසාර මග කෙලවරේ
සුරත නුඹගේ හැර නොයමි මම රකිමි සැමදා ආදරේ

කුල උපත සෙව් නමුත් නුඹගේ මා පියන් නෑසිය ‍දනා
මා නුඹට-නුඹ මට හිඳියි නම් කිමද දුක් ගනු කාරණා
දිනාගනු අරභයා දිරි ගෙන සැබෑවේ මුතු රන් සිනා
හෙටට සවි සිතිවිලි මවාගමු වඩා ‍ස්නේහයෙ භාවනා

2012 ජනවාරි 22

2012/01/20

තුටු


මේ කුළින් බරිත වූ කලුම කලු අහස යට
දෑස් නැති සේම දිසි හාත්පස අඳුර මැද
යදම් බැඳ විලඟු ලූ දෙපා අත් රිදුම් විඳ
හුන් කලක් තිබුණි මට සිපිරි අවකාශයක

මතුදාක පැතු සේම හිරු කිරණ දකිනු රිසි
මගේ සිත ඉවසුවෙමි සි‍යල් කරදර පෙරලි
හෙට දිනේ මල් සුවඳ විඳින්නට සිතු සිතැඟි
වෙනුවෙනුයි පෙර දිනේ පිළිගත්තෙ කටු කැරළි

දාහයෙන් කඳුළැලින් පෙඟී සිටි අළුයමක
සිහින් ගීයකින් සිත පිරී ගොස් හදිසියෙම
උදා අරුණෝදෙ පිදු සිහිල් සුළඟක් සමඟ
විවර වී ඇත මගේ සිර කුටියෙ අගුළු දොර

තිබු ලෙසින් සිතිවිලී සොඳුරු සිහිනෙක වෙලී
නිදහසේ තටු ගසා ඉගිල යමි යලි යලී
‍ජීවිතේ ගං තෙරේ නොනිමි රැළි තුල ගිලී
සතුටු බස් කෑගසා පිහින යමි සැලි සැලී

කවරෙකුට කිසිදාක සිතින් නොම දී නිගා
තුටු මුවින් ගිලිහෙනා සිනා රැකගමි සදා
දැවි දැවී කැරකෙනා ලෝවේ නොම හිඳ නිදා
සිසිල් වැසි පොදක් වන්නෙමි දනන් සනහනා

2012 ජනවාරි

2012/01/06

ඔබ අහස මම



සහස් සෙනෙහස් අහස් සයුරක් සිතේ ඇතිමුත් පැතිරිලා
අරුත් නොදනිම් කුමක් වෙනුවෙන් විසල් පෙම සැදුනිද කියා
කිසිත් අහිතක් නොමැත සොඳුරිය කුමක් කල මුත් නුඹ එදා
‍දනිමි නුඹෙ සිත් මඬළ සිතියම් මගේ සිත නුඹටත් වඩා

මාපියන් හිරු සඳුගෙ වෙස් ගෙන නුඹේ ලොව එලි කල නිසා
සිතුනි මොහොතක නුඹට මගෙ පෙම නොපෙනෙනා තරමැති කියා
ඇසළ අඳුරට හසුව මට මා පවා නොපෙනී ගිය එදා
සිතාගත්තෙමි තාරුකාවක් වන්න නුඹ වෙනුවෙන් සදා

සියක් රෑ කල් ගෙවුණුමුත් ඒ තරුව සෙනෙහස පැතිරුවා
නොබැස කිසිදා අවර අහසින් එළිය තව තව විසිරුවා
හාත්පසඳුර උහුලගනු බැරි විටෙක වැසි දිය ඇතිරුවා
සියක් උල්කා වැටුණුමුත් වේදනා අදරින් ඉවසුවා

සිනිදු පෙති දැඩි කරන්නට ගත් නොතේරුම් සිත සිතුවිලී
කෙලෙස එය කල හැකිද මසොඳුර මිලින වෙද්දී මල් පෙතී
සදාකාලික දෑත් ලොව තුල පවතිනා බැව් පසක් වී
පතා මරණයෙ පහස සිටි මා කරා ආවා නුඹ යලී

අතීත‍යෙ ගත් අඳුරු තීරණ තියුණු මුත් හීයට වඩා
පෙමින් සුව කල හැකියි හදවත් සිදුරු කල පැල්ලම් මකා
නුඹේ නිසසල ජීවිතේ දෙදරුම් වුවත් අද මා නිසා
ස්නේහයක් නිති ගලයි නුඹ වෙත නොලබනා ලොව අන් දනා

නුඹේ අහසට තාරුකාවක් වූ නමුත් මා ඒ සමේ
නොවෙයි අද මා පුංචි තරුවක් නුඹේ අහසම මෙමා වේ
විටින් විට චලිතමුත් දෙරණත උඩු  අහස සෙලවෙනු කෙසේ
සසර දිගු මග නුඹට සවිමත් වියණ් තලයක් වෙමි නඟේ

2012 ජනවාරි 06