2013/11/04

බටගල, ගයමි නුඹ හට!

අගුළු ලා ඇත
නුඹව සිරකල
එක්ටැම් ගෙයෙහි මෙන්ම
ඔවුන්ගේ පටු
අඳුරු සිත් වල...

දොර කවුළු පියන් තද කොට
තබා ඇති මුද්‍රා විනිවිද
හමන සුළඟට මුසු වන
නුඹේ ගත නඟන සුසුවඳ
නැහැය සනසා දෙනෙත තෙමන විට
කුමන සීමා ද මගේ පෑනට...

හසලක වැවට තනියට
ඈතින් නැඟෙන
යෝධ බටගල,
ගත වුව ද
සියක් සියවස් තව
හඬගා කියනු මැන!
හද නැති සිරුරු වෙසෙන
වංගු දහඅටෙන් පහල
ශාපලත්
කුහක තැන්නට...

නොසුදුසු කලෙක
නොසුදුසු රටෙක
පිපුණු තනි මලෙක
රුධිර තැවරුණ
අඳුරු ප්‍රේමාන්දරය සමඟ...

මා සැමදා ගයන
කෙටිම කෙටි
වස්කවිය...
THE SAHAN © 2013 නොවැම්බර් 04

2013/10/14

දිගු වූ රාත්‍රිය

ගත් සැණින සිතුවිලි සුරතට
පෙම් කවි පෙලක් පබැඳුමට
රිදුම් සුළඟක් හැමූ අරුමය
වැටෙන වැහි දිය තබා කොපුලත
දහස් හෙණ අකුණු ද රැගෙන

සීරුවට ඇරඹුණු හැඬුමක
පැටලී පැමිණි හිසරදයක
දෙතොල උරමින් ලුණු රසය පිරී ගිය
වැතිරගමි හිස් සිතින
හැමදාම නුඹේ රුව මවන
ඇඳේ මට උරුම වම් පස

වැටෙන හිතට වෙනදාට
වදින මුක්කුවද නිදන සඳ
දිවිය දිගු වැඩි යයි හිතෙන මොහොතක
කවිය මගෙ අහන්නට
ඉන්නේ කවුරුද හිතට තනියට
THE SAHAN © 2013 ඔක්තෝබර් 14

2013/10/02

ගර්ඩා මට සමාවෙන්න

ලඟදි ඉඳන් හැම හවසක
රිදවමි නුඹගේ මුදු හිත
ගර්ඩා මට සමාවෙන්න
ඇයි ද නපුරු වේසෙන් මම

මට හිතෙන්නෙ මගෙ හදවත
මිදිලා හිම කැටෙක වෙසින
ගර්ඩා මා සනසවන්න
හිතේ තරහ නෑ කියන්න

හැදුවොත් මම සැර කරන්න
මට අසනීපැයි සිතන්න
ගර්ඩා මට හාදු දෙන්න
මගේ තරහ දුරු කරන්න

වීදුරු වැහි බිංදු වලට
තෙමිලා මගෙ ඇස් හොඳටම
ගර්ඩා ඇවිදින් පිඹින්න
වීදුරු කටු වීසිවෙන්න

ඇස් දෙක සෝදාහරින්න
අඬන්න මට ඉඩහරින්න
ගර්ඩා මා වැළඳගන්න
ආයෙම මට පණ පොවන්න

TheSahan © 2013.10.02





2013/09/11

උමතු බව රැකගනිමි


සියොළඟම විෂෙන් පිරි
සුරඟනකි රුවෙන් සරි
එන්නතකි ඇගෙන් පෙරි
හාදු වැහිපොද විසිරි

තෙමුණු දින පළමුවැනි
විෂ සපිරි එ'වැහි පිණි
උමතුවෙන් හද පෙඟුණි
සුව නොවන බව හැඟුණි

ඇතැමුන්ට ම'උමතුව
වගේ දෙනෙතට කටුව
ඇගෙ හාදු කුණාටුව
උන්ට හරි අමාරුව

සියක් සතුරන් මැවේ
උගුල් ඇටවෙයි ලොවේ
තුල ඇගේ පෙම් සුවේ
කිසිත් වැදගත් නොවේ

තුඩින් විෂ බිඳු ගනිමි
තුටින් තුරුළත නිදමි
අමුතු පෙම රඳවගමි
උමතු බව රැකගනිමි

2013.09.10

2013/08/30

තාත්තාගේ ආදරය


අම්මෙකුගේ ආදරය හරියට ඔප දමාපු වීදුරුවක් වගේ පැහැදිලිව පෙනෙද්දි, තාත්තෙකුගේ ආදරය විටෙක හරිම අපැහැදිලි විදිහට දුවෙකුට දැනෙන්නට ඉඩ තියෙනවා! නිමක් නැති සීමා, නීති රීති, සැරවැරකම්, තරවටු කිරීම් සමඟ පීඩාවට පත් වෙන දුවෙකුට, තාත්තා මට ආදරේ නෑ කියලා හිතෙන්නටත් පුළුවන්! 

අම්මා හඳ වගේ නම්, තාත්තා හරියට ඉර වගෙයි! ඉර හැමදාම පායනවා! කිසි කෙනෙකුට ඒකේ ගාණක් නෑ! අව්ව හරි සැරයි, රස්නෙයි කියලා ඉරට හැමෝම බණිනවා! ඉර, සැරම සැර අව්ව පතිත කරන්නේ, ලෝකය සීතලෙන් මුදවගන්නයි කියලා කවුරුවත් දන්නේ නෑ! ඒ වගේම, ඉර කවදාවත් නෑවිදින් ඉන්නේ නෑ! එහෙමත් දවසක රාහු ඇල්ලුවාට, ඉරට අමාවක දවසක් නෑ! ඒත්, හැමෝම මොන රහස් වැඩේ කරන්නෙත්, ඉර බැහැලා ගියාම! ඉරට හොරන්!

ඒත් හඳට හැමෝම ආදරෙයි! හඳ ලස්සනයි, සෞම්‍යයි කියලා හැමෝම හඳේ හොඳ කියනවා! හැබැයි, හැමෝටම අමතකයි, හඳට එලිය ලැබෙන්නේත් ඉරෙන් කියලා! කෙනෙක් ඉරහි අගය හරියට තේරුම් ගන්නේ, කරුවලේ අසරණ උනාම! සීතලේ අතරමං උනාම! නපුරු හීන පිරුණු රාත්‍රියක් නිමා වෙලා එලි වෙන්නේ කොයි වෙලාවේද කියලා නොඉවසිල්ලෙන් ඉන්න සිද්ධවුණාම! 

දුවෙකුට තාත්තාව සම්පූර්ණයෙන් තේරුම් ගැනීමට හැකි වන්නේ, ඇය මවක් වූ දාටම පමණයි කියලයි මට හිතෙන්නේ! තාත්තා තමන් කෙරෙහි එදා ඒ විදිහට හිටියේ ඇයිදැයි කියා ඇයට එදාට වැටහේවි! එදා තමන් හිරවුණු නීති රීති, තමන්ගේ ජීවිතයට කොයිතරම් බලපෑවාද කියන දේ, ඈ තේරුම් ගනීවි! එදාට ඇය කම්පා වේවි, ළමා කාලයේදි, තරුණ කාලයේ දී තාත්තා ඇයට නීති රීති දාද්දි, තරවටු කරද්දී ඇය තාත්තාත් සමඟ තරහා ගත් අයුරු මතක් කරමින්! තාත්තා තමන්ට කොපමණක් නම් ආදරේ කරන්න ඇත්දැයි සිහි කරමින්!

ඔබ ඔබේ තාත්තාව විශ්වාස කරන්න! තාත්තාගේ නීති රීති විශ්වාස කරන්න! මම ආයෙමත් කියන්නේ, තාත්තා හරියට ඉර වගෙයි! කොයිතරම් අව්ව සැර උනත්, ඉර ඔබට ආදරෙයි!

සහන් පද්මසංඛ පීරිස්
(THE SAHAN)
2013 අගෝස්තු 30

2013/05/29

මිනිත්තුවකි ජීවිතය



මම සහන්!
මම කතාවක් කියන්නම්!

එකෝමත් එක කාලෙක, සුරූපී සුරඟනක් වාසය කලා! මේ සුරඟනට හොර රහසින් පෙම් බැන්ද පුංචිම පුංචි වවුල් පැටියෙක් හිටියා! සුරඟන යන එන විදිහ, ඇගේ කතාව, හිනාව දිහා ඌ හොර රහසේ බලා හිටියේ හරිම ආදරයෙන්! "මම පියාඹන්නේ ඇය වෙනුවෙන්" ඒ ඌ පියාඹන්න කලින් හිතන දේ! "මම කෑම කන්නේ ඇය වෙනුවෙන්" ඒ ඌ ආහාර ගන්න කලින් හිතන දේ! කරන හැම දෙයකටම, සිද්ධවෙන හැම දෙයකටම සුරඟනව කොහොමහරි සම්බන්ධ කරගත්තා ඌ!

අවුරුදු ගණනාවකට පස්සේ, වවුල් පැටියා තීරණය කලා, උගේ ප්‍රේමය සුරූපී සුරඟන ඉදිරියේ පවසන්න! ඒත් සුරඟනගේ ප්‍රතිප්‍රේමය, ඌට සිහිනයක්! කොහොම උනත්, ඌට සුරඟනගෙන් තොර වෙනත් ලොවක් නොතිබුණු නිසා, ඌ එක් දිනක් උදයේම හිතට හයිය අරන් සුරඟන සිටි දිහාවට පියෑඹුවා! වවුල් පැටියා පියාඹාගෙන එන හැටි ඈත තියාම දැක්ක සුරූපී සුරඟන, ඇගේ හිරිපොද වැස්සක් මෙන් සිහිල් හිනාවෙන් ඌව පිළිගත්තා! සුරඟන අසලින් හිඳගත්තු වවුල් පැටියාගේ පුංචි හදවත වේගයෙන් ගැහෙන්නට පටන් ගත්තේ වෙන කවරදාකවත් නැති විදිහට!

"ලොව ඇති පිරිසිදුම හදවත හිමි
සුරූපී සුරඟන වන ඔබට,
මේ කාරණය පැවසීමට
මා තරම් නොවන බැව් දනිමි!
නමුදු, දෙනු මැන අවසරය,
සුරඟන මදකට!"

ඌ උගේ බොහොම සියුම් සහ ගැහෙන සුළු කටහඬින් එලෙස පැවසුවා! වවුල් පැටවාගේ කාරණය පැවසීමට අවසර දෙන බැව් අඟවමින් සුරඟන හිස වැනුවා! ගද්‍යයෙන් පවසනු වෙනුවට, වවුල් පැටවා දෙනෙත් පියා, ඉතා මිහිරට ගීයක් ගයා පැවසූවා, තම හිත පුරාම වෙලී පවතින සුවිසල් ප්‍රේමය පිළිබඳව! නිහඬ බව පිරුණු වටපිටාව මධ්‍යයයේ, වවුල් පැටවාගේ සියුම් හඬ හොඳින් ඇසුනා! ගීය අවසානයේ ඌ හෙමින් දෙනෙත් ඇරියා! සුරඟනගේ සිනහව අතුරුදහන් වී තිබුනා! ඈ පුදුමයෙන් ද කෝපයෙන් දැයි වවුල් පැටවාට තේරුම් ගන්න අසීරු වුණා! සැබැවින්ම සුරූපී සුරඟන සිටියේ කිසිම දෙයක් තෝරාගත නොහැකි තරම් පුදුමයෙන්! ජීවිත කාලය පුරාම අපේක්ෂා කරපු දෙයක්, තමන් ඉදිරියට කඩා වැටුණා වැනි හැඟීමක් ඇගේ හිතට එබිකම් කරමින් තිබුණා! සිතෙහි ඇතිවුණු වික්ෂිප්ත බව නිසාම, ඇගේ මුහුණින් කිසිදු හැඟීමක් පිටවූයේ නැහැ!

අවුරුදු ගාණක් රහසින් ගොඩනඟපු මහත් වූ ප්‍රේමය සුරඟන ඉදිරියේ පිටකරපු වවුල් පැටවාගේ හිතට දැණුනේ අසීමිත සැහැල්ලුවක්! ඒත් ඒ අතරේම මහත් වූ කණගාටුවකින් හිත වෙලී යන බව ඌට දැණුනා! තම සිහිනය සිහිනයක්ම පමණක් බැව් දැණුනු නිසා, ඌ ආපසු යන්න හැරුණා! මඳක් දුරක් ඇවිදගොස් පියෑඹීමට පෙර, ඌ නැවත සුරඟන දෙසට හැරුණා! ඌ නැවත ගැයුවා! ඒක ප්‍රේමය, පරාජය, බිඳුණු බලාපොරොත්තු සහ හීන මුසු වෙච්ච සංවේදී ගායනයක්!

"සුරූපී සුරංගනාවියනි!
නුඹේ,
කල්පිත ප්‍රතිප්‍රේමය වෙනුවෙන්
මා සූදානම්,
මගේ දිවියම
නුඹේ සුවඳැති
ශ්වේත පා මතපුද කරන්නට!

සුරූපී සුරංගනාවියනි!
නුඹේ,
කල්පිත ප්‍රතිප්‍රේමය..
කෙතරම් මිහිරියි ද එය!
දනිමි එය මට
නොලැබෙනා බව!

නමුදු උපකල්පනය කරනෙමි!

සුර අඟන නුඹ
පෙම් කලොත් මට
නුඹේ පිරිසිදු
මුළු හිතින්...

සුර අඟන නුඹ
පෙම් කලොත් මට
තැනින් උපදින
හදෙහි ජීවය...

සුර අඟන නුඹ
පුද කලොත් මට
පරම සත්‍යැති
ප්‍රේමයක්...

හකුළවමි මම
මගේ මුළු දිවි
සැණින් ගෙවෙනා
මිනිත්තුවකට!!"

එසේ කියා වවුල් පැටවා තම කඳුළු රූරා වැටෙන දෙනෙත සුරඟනගෙන් වෙන් කොට, පියඹා යන්නට වුණා! සුරූපී සුරඟනගේ දෙකම්මුල් හරහා ඇඳෙන ද්වී කඳුළු රේඛාව ඌ දුටුවේ නෑ! ඌ සුරඟනගෙන් ටිකෙන් ටික ඈත් වෙමින් පියෑඹීම සිදු කරමින් සිටියා! සුරඟන කෑගැසුවා!

"කාල දෙනෙතැති වවුල් පැටව..
නුඹේ පෙමට පමණක් දෙවැනි වූ
විසල් ප්‍රතිප්‍රේමය
නුඹ සතුය අද සිට"

මේක ඇසුණු වවුල් පැටවාට සිහි එලවාගත නොහැකි වුණා! ගමන් මඟ ආපස්සට හැරවූ ඌ වේගයෙන් හුස්ම ගනිමින් සුරඟන දෙසට පියාඹා ගොස් ඇගේ ශ්වේත පා තුඩු මත හිඳගත්තා! ඌ උගේ තද කළු ඇස් වලින් සුරඟනගේ නිල් දෙනෙත් දෙස බැලුවේ මිහිමත කිසිම බලවේගයකට පරාජය නොකල හැකි ප්‍රේමයක් ඒ ඇස් වල පුරවාගෙන යි! ඇගේ දෙනෙත් පිළිබඳවත් පැවසීමට තිබුනේ එයම මිස වෙනෙකක් නොවේ!

එහෙත් කාටත් හොරෙන් මිනිත්තුව සම්පූර්ණ වුණා!
වවුල් පැටවාගේ කුඩා සිරුර, සුරූපී සුරඟනගේ ශ්වේත පා මත සදහටම නිසල වුණා!

කතාව ඉවරයි!
මම සහන්!
මම තවම ඉන්නේ
මිනිත්තුවක් ඇතුලේ!
TheSahan©
2013.05.28


2013/05/02

රණ්ඩුවක නටඹුන්ය


විදුලි ඇසිපිය හෙලා
වැස්සකට තටමනා
අහස්කුස නුඹ වගෙයි හිතෙනවා

ටිකක් ලොකු වැහි කැබලි
තරහින්ම අතහරින
දම්පාට ඇස් නුඹේ දිලෙනවා

විසිර ගිය හාත්පස
රණ්ඩුවක නටඹුන්ය
නුඹේ කට නැතිව ඉකි ගැසෙනවා

එපා කියනට එහෙම
එපා ආයෙම ඔන්න
මම සුළඟ වී නුඹව සිපිනවා
2013 අප්‍රේල් 22


2013/03/22

සේනා






අනුන් කොටවා
සතුට ලබනා

තැඹිලි පාටැති
යක්ෂ සේනා

2013 මාර්තු 21



2013/02/14

ආදරේ දිනේ



බූරු කොලයක කොණක
හැඳ තිබෙන සළකුණක
මිල උපරිමෙට නගින
ආදරේ දිනක් ඇත

රේඩියෝ වෙසඟනන්
ජීවිතේ බර මනින
අපට එය කියා දෙන
ආදරේ දිනක් ඇත

රෝස පැහැ පෙම්වතුන්
ඇඳක පැල්ලම් මතින්
ප්‍රේමයේ ඉම හොයන
ආදරේ දිනක් ඇත

හැමදාම ප්‍රේමයෙන්
හද පිරුණු මට - ඇයට
පයිසයක වැඩක් නැති
ආදරේ දිනක් ඇත

2013.02.14

2013/01/17

Hourse & the Tree


(සිතුවම විශාල කර බැලීමට පින්තූරය මත ක්ලික් කරන්න)