2015/11/08

ඔබ වහන්සේට සුබ ගමන්!!

ශ්‍රී ලාංකීය සිවුරුකාරයින් පිළිබඳව මා තුළ ඇති ආකල්පය ඉතාමත් අයහපත් එකකි. ඇතැමුන් එළිපිට කුණුහරප කියා දඟලති. අන්‍යාගමිකයික් කපා කොටා දමන්නට අනුබල දෙති. ඇතැමුන් බඩුකාරයින් ය. තවත් අය කොලුකාරයන් ය. තවත් සමහර අය බේබද්දන් ය. කට පිහගන්නේ ද සිවුරෙනි. තව බොහෝ දෙනාගේ කොණ්ඩා රැවුළු, චර්යා, හැසිරීම් සියල්ල දැක අවසානයේ ලාංකීය සිවුරුකාරයින් පිළිබඳ මා තුළ ඇත්තේ අසූචි අප්‍රසන්න බවකි.

එහෙත් මාදුළුවාවේ සෝභිත නම කියද්දී මට හැමවිටම දැණුනේ සිවුරුකාරයෙක් ගැන නොව භික්ෂුවක් ගැන යි. මම උන්වහන්සේව නොහඳුනමි. මා උන්වහන්සේ ගැන දන්නේ ද ඔබ මෙන්ම ජනමාධ්‍ය ඔස්සේම පමණි.

සෝභිත හිමි පිළිබඳ මාගේ ප්‍රථම මතකය ඇත්තේ රූපවාහිනිය ඔස්සේ විකාශය වූ ධර්ම සාකච්ඡාවක් පිළිබඳවයි. වර්තමාන සිවුරුකාරයින් බණ කියනා අයුරුද මහත් සේ අප්‍රසන්න වූ යුගයක යි සෝභිත හිමි සහභාගී වූ ඉහත කී දහම් දෙසුම මා දුටුවේ. එය මීට අවුරුදු කිහිපයකට පෙර එළැඹි වෙසක් පොහෝ දිනෙක ස්වර්ණවාහිනී නාළිකාව සංවිධානය කළ විශේෂ වැඩසටහනක් වූ අතර එය විකාශය වූයේ කුසිනාරාවේ සිට යි.

බුදුන්වහන්සේගේ පරිනිර්වාණය එම ධර්ම සාකච්ඡාවේ මාතෘකාව විය. සෝභිත හිමි උන්වහන්සේටම ආවේනික වූ ශෛලියෙන් බුද්ධ පරිනිර්වාණය පිළිබඳ කතාව කියන්නට විය. නිර්ආගමික අදහස් ඇති මාගේ දෙනෙත් ද එය අසා සිටියදී තෙත් වන්නට වූයේ උන්වහන්සේ එය කොයි තරම් සංවේදී ලෙස පැවසුවේද යන්න ඔප්පු කරමිනි.

බොහෝ සිවුරුකාරයින් ධර්ම දේශණා අතරතුර ගොන් ජෝක්ස් දමයි. ද්වීඅර්ථ ඇති කුණුහරප කියයි. ධර්ම ශ්‍රාවකයින්ට කුණු ආතල් දෙයි. නමුත් සෝභිත හිමිගේ දහම් දෙසුම් තුළ මා එවැන්නක් කිසි දිනෙක දැක නැත.

ජාතික ප්‍රශ්ණවල දී සිවුරුකාරයින්ගේ මැදිහත් වීම ද නොගැලපෙන සුළුය. අප රටේ ජාතික ප්‍රශ්ණවල දී මැදිහත්වන බොහෝ දෙනා ආවේගයෙන් කතාකරන, ආවේගයෙන් හැසිරෙන, නිළ නොවන හමුදාවක් ලෙස හඳුන්වාගන්නා සිවුරු පැළඳගත් මී හරකුන් ය. ඇතැමුන් හරකුන් වෙනුවෙන් ගිණිතබාගෙන සියදිවි නසාගන්නා හරකුන් ය.

නමුත් මෙරට තීරණාත්මක ජාතික වෙනසක් සඳහා මූලිකත්වය ගත් සෝභිත හිමියන්ගේ හැසිරීම, කතා විලාශය හෝ මැදිහත් වීම කිසි දිනෙක චීවරයට නොගැලපෙන්නක් වූයේ නැත. අද දින යහපාලකයින් පිළිබඳ කුමන විවේචන ඇතත් පසුගිය ජනපතිවරණ ප්‍රතිඵලයෙන් රටට ලැබුණේ අනාගත විනාශයක වැලකීමකි.

මෙන්න මේ කාරණා නිසා මගේ හිත තුළ සෝභිත හිමිට ඉතා ඇල්මක් පැවතිණි. මෙලොව බොහෝ කල් වෙසෙන්නේ යහපත් මිනිසුන් නොව අයහපත් මිනිසුන් ය. ඇතැම් විට එයට හේතුව එකම දුක් ගෝලයක් වූ ලෝකයෙහි වැඩිපුර කාලයක් වාසය කිරීම යනු වැඩි කාලයක් දුක් විඳීමට සිදුවීම විය හැක. 

ආගමික නායකයෙකු මියගිය විට මා කිසි දිනෙක ඒ වෙනුවෙන් පෝස්ට් දමා කහ කොඩි ෂෙයා කොට නැත. එහෙත් මම අද එය කරමි.

මාදුළුවාවේ සෝභිත හිමියනි, ඔබ වහන්සේට සුබ ගමන්!!
_________________________
සහන් පද්මසංඛ පීරිස් 
THE SAHAN​ © 2015 නොවැම්බර් 08

2015/07/03

දේදුනු පෙරහන්



හමුව ඇගෙ සිත පෙමක රැඳි වග සිහිනයෙක රූසිරි මවා
අදහගන්නට සැබෑවක් වග නොහැකි තුටු සිත පිරවුවා
බිය ඇතත් හිත තුල මහත් එය වසා පෙම් බස් මිමිණුවා
වෙනස් බැඳුමන් බැඳෙනු නොහැකි ද දෙදෙනගෙම හද විමසුවා

ඉවසගන්නට පෙමක වෙනසක් නොහැකි වුණු ගල් කැට පවා
ඇගේ සියුමැළි සුමුදු නළලත රුධිර තිලකය තැවරුවා
හදිසියෙම දුර ඇමෙරිකාවෙන් දේදුන්න මෙහෙ පෑයුවා
පළමු ගල ගැසු සරණපාලත් මුහුණුපොත උගෙ සැරසුවා

දුටුවමුදු ඒ සොඳුරු දේදුනු පෑයු මහ මුහුදින් එහා
තවම ඉක්මන් නොවී හිටපන් සඟවගෙන ඔය පෙම මහා
නොම බලන් දේදුනු පෙරන් සවිකරන් ඉන්නා උන් දිහා
මුහුණුපොත බිතු යටින් හමනා දුගඳ පැතිරෙන වහ වහා

සහන් පද්මසංඛ පීරිස්​
THЕ SAHAN​
2015.06.30

2015/06/21

සුබ වේවා මචං!


2009 සිට මම ෆේස්බුකේ කවි ලියමි. ඒ දිනවල ලියූ කවි දෙස බලන්නටත් මට දැන් ලැජ්ජා ය. 2010 සහ 2011 ආසන්න කාලය ෆේස්බුකේ ගත කළ සොඳුරුම වකවානුව යි. අද මා කුමන හෝ ජාතියක කවියෙකු ලෙසින් කවුරුන් හෝ අයෙකු හඳුණාගනී නම්, මා පෙර කී සොඳුරු වකවානුව තුළ මා ෆේස්බුක් ඇසුරෙහි කියැවූ කවි, ඉගෙන ගත් දෑ ආදිය ඊ්ට බොහෝ උපකාරී වන්නට ඇත.

ෆේස්බුක් කවියෙකු ලෙස, ෆේස්බුක් කවිකමම මා හට බොහෝ දේ අහිමි කෙරුවේ ය. ඒවායින් සමහරකට කිසි දා මිලක් නියම කළ නොහැක. නමුදු ඒ අහිමිවීම් සමූහයම මට තවත් මිල කළ නොහැකි දෑ ගෙනැවිත් දෙන්නට සමත් විය. ඉතින් ඒ අතින් බැලූ විට, ෆේස්බුක් කවිකම මා හට බොහෝ විපර්යාස සිදු කර ඇත. අද සිට අතීතය ගැන කල්පනා කරද්දී ඒ විපර්යාස පිළිබඳ හිතට දැනෙන්නේ යම් ආකාරයක සතුටකි.

පෙර කී සොඳුරු යුගයෙහි ෆේස්බුක් කවීන් සිටියේ මතක තබාගත හැකි  ගණනකි. දැන් නම් මෙහි සිටින හැමෙකාම කවියන් ය. එදිනෙදා කතා කරන දෙබසක් ගෙන, එහි වචන කැඩීම පමණක් සිදු කර ලියන රචනාකරුවන් ද කවියන් ය. බස්සීගේ නිර්වචනයෙන් කිවහොත් ඒවා "පහළට කවි" ය. එක් අතකින් එය හොඳ ය. හැමෝම කවියන් යයි කියාගන්නා තැනෙක, හොඳ කවියෙකු ලෙස අයෙකු බිහි වේ නම්, ඌ පට්ට පොරක් ලෙස මම දකිමි. එමෙන්ම එවන් පට්ට පොරවල් අල්ප වීම නිසා බොරළු ගොඩක මැණික් මෙන් දිස්නේ දෙනවා ද ඇත.

ෆේස්බුක් කවිකමෙන් බිහි වූ පළමු පොත ලෙස මා දුටුවේ ටැටූ කොටනා හොර ගුණේ මාමාගේ "හිතේ කෙටූ ටැටූ" ය. එකල ගුණේ මාමා මා හඳුණන්නේ නැත. ඒ ටැටූවලට වඩා ගුණේ මාමාගේ දැන් කවි පට්ටෙත් පට්ට ය. 

ඊට පසු මගේ මතකයට එන්නේ මිහිරි අක්කාගේ පෑළවිය පොත ය. මට එම පොත එළිදැක්වීමට සහභාගීවීමටම උවමණා වූයේ මිහිරි අක්කා යනු මා ෆේස්බුකෙන් හඳුණාගත් ආදරණීයම චරිතයන්ගෙන් එකක් වන නිසා ය. එයට සහභාගී වීමට නොහැකි වූ නමුත් උත්සවයට අදාළ ඩිසයිනයක් කර දී හිතේ දුක අඩු කර ගත හැකි විය.

පසුව ෆේස්බුක් කවියන් කිවිඳියන් කිහිප දෙනෙකුම පොත් ගැසුවෝ ය. ඒ එකකට හෝ එන්නට නොහැකි වූයේ මා සිටියේ අගනුවරින් බොහෝ දුර වීම නිසා ය. ආසන්නතම පොත වුණු සඳුන් අයියාගේ පොතේ එළිදැක්වීමටත් එන්නට බැරි වූ හේතුව එය යි.

රියල් මචං ප්‍රොෆයිලය ෆ්‍රෙන්ඩ් ලිස්ටෙකේ ඇත්තේ බොහෝ කලක පටන් ය. නමුත් මා ඔහුගේ කවක් කියෙව්වේ ඉතා මෑතක දී ය. කවිය මතක නැතත්, මා මුලින් කීවා සේ පට්ට පොරක් ය යන හැඟීම ඒ මොහොතේ මට ඇති විය.

මචං පිටුපස සැඟවී සිටි සම්පත් කුරුප්පු ආරච්චිගේ කවි පොත එළිදැක්වීමට අද ගියෙමි. කිසිදාක හැබැහින් නොදුටු මචංකාරයා දැකගත්තෙමි. කලක සිටම ෆේස්බුකෙන් පමණක් දැක සිටිවුන් බොහොමයක්ම හැබැහින් දැක්කෙමි. ඉතින් එය මට මහත් වූ සතුටු ගෙන දෙන්නකි.

මෙතෙක් බොහෝ උන්ගෙන් මට පෙනුනේ ෆේස්බුක් කවිකමින් ඉපිද පොත් ගසා මිය යන සෙයකි. පොත ගැසූ පසු කලින් මෙන් කවි නොලියා සිටිති. සමහරුන් හිටියාට වඩා පට්ට ප්‍රබුද්ධ ‍වෙති. ඇතැමුන් හිටියාටත් වඩා ලෙංගතු වූ මුත් කවි අඩුවෙන් ලියති. ඉතිං, මේ පොතෙන් පස්සේ මචන්ගේ කවි උල්පත හිටින්නේ නැති වේ යැයි අපේක්ෂා කරමි. දැන් ඇහින් දැක්ක නිසා මචං දානා කවි තවත් හොඳින් ද කියවමි. තාම පොත නොකියවූ නිසා පොත ගැන කිසිවක්ම නොකියමි.

රියල් සම්පත් මචං, උඹට සිරාවටම හදවතින් සුබ පැතුම්!

සහන් පද්මසංඛ පීරිස්​
THЕ SAHAN​
2015.06.20

2015/06/16

යෙහෙළියක නම් සිටිය යුතුම ය


යෙහෙළියක නම් සිටිය යුතුම ය
හැමදාම හැමවිටම හැමතැනම

යන්තමට පිපාසය එනකොටම
දැන් ඉතින් මට
උණු කරපු හාදුවක් පොවන්නැයි
තුනීයට කොඳුරන්න හැකිවෙන්න
තෝඩු ලූ කනක් උර මත තිබ්බ
යෙහෙළියක නම් සිටිය යුතුම ය

තොරක් නැති හීනංශුකා වලට
මගෙ හිතේ ඉඩ
දරුණුවට මදි වෙද්දි ටිකෙන් ටික
හීන අහුරක් දෙකක් තබන්නට
හිසෙහි පෙදෙසක්ම අස් කර දෙන්න
යෙහෙළියක නම් සිටිය යුතුම ය

දිගු ප්‍රේම ගිම්හානෙකට පසුව
විරහවක අග
නමක් නැති නැවුම් සුබ ඉර්තුවක
හදින් අල්ලා තදින් මිරිකන්න
ප්‍රේමවන්තියගෙ තැන අරගන්න
යෙහෙළියක නම් සිටිය යුතුම ය

ඔව්!
ලෝකයේ සැබෑ සිරි පෙන්නන්න
සොබා පැහැයන් ඇසේ තවරන්න
තවම ජීවත් වෙතැයි දැනගන්න
යෙහෙළියක නම් සිටිය යුතුම ය
හැමදාම හැමවිටම හැමතැනම


සහන් පද්මසංඛ පීරිස්​
THЕ SAHAN​
2015.04.16

2015/05/27

අසැබි නම් පුරුෂ ලිඟුව


හිටපු අමාත්‍ය පාර්ලිමේන්තු මන්ත්‍රී ගරු බන්දුල ගුණවර්ධන මහතාගේ “ඓතිහාසික” සිංහල ගැට පද විවරණ පංතියෙන් පසු ශ්‍රී ලංකාව තුල භාෂාව වෙනස් වී ඇති අයුරු! 

පයිය = පසුම්බිය, මල්ල, වැස්ම, මඩිස්සලය, එල්ලීම (අසැබි නම් පුරුෂ ලිඟුව)
පක = ගෙඩිය, ඵලය, පැසුණ ගෙඩිය, ගෙඩියක් වැනි ඕනෑම දෙයක්, සතුන්ගේ බෙට්ටිච්ච (අසැබි නම් පුරුෂ ලිඟුව)

-----------------------------

උදෑසන රූපවාහිනී ප්‍රවෘත්ති

සිරස්තල
“ඉන්දියානු මහ මැතිවරණයේ ඡන්ද ප්‍රතිපක නිකුත් වේ.
ඊයේ රාත්‍රියේ පකස්තීනයේ සිදුවූ බෝම්බ ප්‍රහාරයෙන් 10 දෙනකු මරුට.
ප්‍රේම සම්බන්ධතාවයට දෙමාපිය ආශිර්වාදය නොලැබීම නිසා සිත් තැවුලට පත් තරුණිය කාමරය තුළ පයි වී මරුට.”

-----------------------------

බස් රථයක් තුල

කොන්දොස්තර මහතා පැමිණේ.
“ඔය නැග්ග අය සල්ලි ගන්න”
“බහිද්දි දෙන්නං අයියෙ, සල්ලි පයියෙ. දැන් එළියට ගන්න අමාරුයි”
“මල්ලි ඔය පයියවල් කරේ දාගෙන නගින්නෙපා. නංගි පයියවල් අතට අරං නගින්න. මහත්තයා ඔය පයිය උඩින් දාගන්න. ඔයාගෙ පයිය නිසා ඔතනින් අනික් අයට යන්න බෑනෙ. දොරේ පයි වෙලා ඉන්ටෙපා.. උඩට නගින්න.. පොලිසියෙන් ලියනවා..
හරි යං..!!”

කුඩා දරුවෙක් තාත්තාට යමක් පවසනු පෙනේ.
“තාත්ති මට වමනෙ යන්න වගේ..”
“ආ පුතා.. මේ සොපින් පයියට දාන්න..”
“ඔවෑක්....”

-----------------------------

වෙළඳ සැළක්

“මේ ඇපල් පකක් කීයද?”
“පකවල් 10ම 100යි නෝනා.”
“එහෙනං මට පකවල් 5ක් දෙන්න.”
“හොඳ පකවල් ටිකක් තෝරගන්න නෝනා.”
“ම්.. මේ පක නම් තැලිලා.. ආ! මේ පක හොඳයි.. මුදලාලි මට මේ පකවල් 5 දෙන්න.”
“අනේ මේක පොඩියිනේ! ලොකු පයියක දාලා දෙන්න මුදලාලි.”

-----------------------------

පාර අයිනේ පිහිටි නිවසක්

“ආන්ටි ආන්ටි.. වතුර ටිකක් දෙන්න පුලුවන්ද.. මගෙ ඔලුවට කුරුළු පකක් වැටුණා. :( 
මුං එක එක පකවල් කාලා කාලා අපේ ඔලුවටමනේ ආන්ටි පක දාන්නෙ! සික්! ”

-----------------------------

ෆේස්බුක් චැට් එකක ස්ක්‍රීන් ෂොටක්

“මචන් Chameera​! අරුංගේ පේජ් වලින් උඹට දිගට හරහට නෙළනවා නේද බං? :( ”
“ඕවා මොනවද මල්ලි! පක ඇති රුකටනේ ගල් ගහන්නේ! :3 ”

-----------------------------

පැරණි ගීතයක රීමික්ස් ගීතයක් ප්‍රචාරය වේ

“දෙඅදර විලිකුන් සුරත් පකේ
පෙම් මදිරා අයදිමින් සැළේ
සීත මීදුම් සිහින වැල් පැටලේ”

----------------------------

සති පොලක වට්ටක්කා විකුණනා ස්ථානයක්

“මේ කොල්ලො.. මේ පකවල් වලට බෙහෙත් ගහලද මේ හැටි ලොකු?”
“නෑ ආච්චි! කමතෙ හැදුණ පකවල්! පේන්නැද්ද පාට! :3 ”
“එහෙනං මට පක බෑයක් දීහං! ආ! ඉඳා මේ සිලිපයියට දාහං! ” 

-----------------------------

විකිපීඩියාවේ කොටසක්
“බැබි‍ලෝනියාවේ පයිවෙන උයන, සෙමිරමිස් හි පයිවෙන උයන යනුවෙන්ද හඳුන්වයි.”

-----------------------------

ප්‍රස්ථා පිරුළක්
“ගිලෙන්න යන මිනිහා තුත්තිරි ගහෙත් පයි වේ.”


සහන් පද්මසංඛ පීරිස්


2015/05/26

සිහි උනා ඒ දවස්


අහම්බෙන් දුටුව එක

පෙම්වතුන් යුගලයක්

"නූඩ්ලස් කමු ද මහේස්?"

අම්මෙක්ම වාගේම
ඇය එහෙම අහනකොට
කුඩා දරුවෙකු වගේ
හිනැහුණා ඔහුත්

එතකොටම

"ඔයා ආසා දෙයක්"
හුඟක් දේ සඟවාපු
හරි හීනි හඬක්

මට ඉතිං සිහි උනා

අරුම ඒ දවස්
ලොවේ නන් දනන්ගෙන්
වෙනස් වූ අපිත්..

මවක් වන් වූ නුඹත්..

හුඟක් දේ මට දුන්න
නුඹත්..
ඒ වගෙම මමත්..
හුඟක් දේ නුඹෙන් නොඅරගත්තු
මමත්..

සහන් පද්මසංඛ පීරිස්
2015 මැයි 16


2015/05/19

රැවටුම


මිතුරු වෙසැති හතුරන් ද හතුරු වෙසැති මිතුරන් ද මොක්කුදැයි ඔබට තේරුම් ගත හැකි වන්නේ බොහෝ කලකට පසුව ය. ඔව් ඔබ රැවටේවි! අවුරුද්දක්.. දෙකක්.. 5ක්.. 10ක්.. ඔබ රැවටේවි!

ඔබ රැවටී ඇති බව වැටහෙන මොහොතේ දී ඔබ ඔබට කතා කරගත නොහැකි තරම් කම්පන අවස්ථාවකට ලක් වනු ඇත. නමුත් කම්පනය අවසන් වන ඊළඟ මො‍හොතේ ඔබ විඳින ශාන්තිය තේරුම් ගැනීමට නම් ඔබ එවන් අවස්ථාවක් අත්දැක තිබිය යුතුම ය! රැවටී ඇති බව තේරුම් යාම මහත් වේදනාවක් ගෙන දෙන්නකි! රැවැට්ටූ අය පිළිබඳව මහත් වෛරයක් ගෙන දෙන්නකි! ඔබව රැවැට්ටූ පුද්ගලයාටත් වඩා ඔබ වෛර කල යුත්තේ, ඔබව රැවටෙන බව දැන දැනත්, එය ඔබෙන් සැඟවූ අයට ය! රැවැට්ටීමට උදව් කරමින්, ඔබට මිතුරු මුහුණ පෙන්වූ අයට ය!

ඇතැමුන්ට "ඔබ රැවටෙමින් සිටිනවා" යැයි ඔබ හට ඍජුව කීමට අපහසුකමින්, ව්‍යංගයෙන් එය කීමේදී, ඔබ එය තේරුම් ගන්නේ වැරදියට ය! එවෙලේ ඔබට ඔහු හතුරෙකි! නමුත්, ඔබ රැවටී ඇති බව දැනගත් වහාම, චිත්‍රපටයක් මෙන් සියළු දේ හි ගැට ලිහෙමින් ඔබ ඉදිරියේ දර්ශනය වනු ඇත. ඔබ නොදුටු දේ ඔබට පෙනෙනු ඇත! ඔබ දුටු දේ, දුටු දේම නොවන බව වැටහෙනු ඇත.

අවසන, මා පෙර කී ශාන්තිය අත්විඳින අවස්ථාවේ දී, ඔබව රැවැට්ටූ අය, රැවටෙන බව දැන දැන වසන් කල අය, රැවැට්ටීමට උදව් කළ අය පිළිබඳව හිතෙහි ඇති වී නැති වී යන නොතිර කෝපය හැරුණු කොට, ඔබවත් ඔබ වටා ඇති ලෝකයත් දවන ස්ථිර වූ වෛරය ශූන්‍ය කර දැමීමට ඔබට හැකි නම්, ඔබේ ශාන්තිය අසීමිත එකක් වනු ඇත. මා පවසන්නේ ආගමික හෑල්ලක් නොව මගේම අත්දැකීමක සංශිප්ත සාරාංශයක් පමණි.

ඉතින්, වෛරය ශූන්‍ය කිරීමට උදව් වන අය ද ඔබට හමුවනු ඇත. ඔවුන්ව විශ්වාස කරන්න! ලොව සියලු මිනිසුන් ගැන අවිශ්වාසයෙන් බැලීමට තරම් ඔබව පරාජය කිරීමට, ඔබව රැවැට්ටූ  පිරිසට ඉඩ නොතැබීම ඔබේ ජයග්‍රහණයෙන් කොටසකි.

අන්තිමටම, ඔවුන් ගැන වෛරයක් නැති ඔබ, සිනහවෙන්, සංයමයෙන්, ඔවුන්ව අමතද්දී, වරදකාරී මානසිකත්වයෙන් යුතු ඔවුන් එක් වී ඔබ හට තව තවත් අණිනා ඇණුම් සිනහ වී ඉවසද්දී, ඔබේ ශාන්තිය සහ ජයග්‍රාහී හැඟුම් තව තවත් ඉහල යනු ඇති අතර, කවුරුන් කෙසේ පුරසාරම් දෙඩූවත්, ඔබ රැවැට්ටූ උන්ගේ හිත් මහත් වූ පීඩාවක සදා කල් රැඳෙනු ඇත

සහන් පද්මසංඛ පීරිස්
2015 මැයි 19

2015/04/14

නාවනම් අවුරුදු කුමාරිය - දුක් කවක් ලියැවෙන්න තිබුණා



ගෑණු හිත් වාගේම එක එක
රාශි පැන පැන මාරු කර කර
අලුත් අහසක පහස පතනා
හිරුත් වදයක් වෙන්න තිබුණා

හුඟක් රා බිව් කුරුල්ලෙකු මෙන්
ගහක් උඩ නැග කොහෝ හොටගින්
කරන මහ කං කරච්චලයත්
දෙසවනට නෑහෙන්න තිබුණා

සැවොම රහ කර කාපු කිරිබත්
දෙවඟනක පලපුරුදු දෑතින්
අලුත් කිරි දා හැදූ මුත් මට
ගොඩක් ලුණු වැඩි වෙන්න තිබුණා

"කොහොමදැ යි අවුරුද්ද" විමසන
මිතුරු පණිවිඩ වලට එක ලෙස
"මට කොහෙද අවුරුදු මචං" යයි
හිස වනා පවසන්න තිබුණා

සැබෑ අවුරුදු කුමාරිය ලෙස
වසත් සුවඳැති දුඹුරැසිය නුඹ
නාවනම් බක් මහට පෙර - අද
දුක් කවිත් ලියැවෙන්න තිබුණා
_____________________________
සහන් පද්මසංඛ පීරිස් | THE SAHAN
2015 අප්‍රේල් 14

2015/03/31

කැස්ස සහ වැස්ස


හදිසියෙම උගුරෙ හිරවන
පැරණි පෙම් පුවතක
සිහින් බූවකට වැළදෙන
සියක් ගව් දුරකට ඇසෙන
කැස්ස ඇය

තනිව ප්‍රතිශක්තිය හැදුමට
බෙහෙත් ගන්නැති මට
උදව්වක් වෙන්නට
හැලෙන ප්‍රතිජීවක වත්කොට
වැස්ස මැය

______________________________
සහන් පද්මසංඛ පීරිස්​ | THЕ SAHAN​ 
2015 මාර්තු 31

2015/03/28

නාදුනන හිතවත



හදිස්සියෙම හදට ගොඩවැදුන
කැම්පස් කෙල්ලක් ය ලං උන
බොහෝ දෑ දෙඩූමුදු
තවත් මදියැයි හිතවන

පාඩමක් ගැන විස්තර අතරතුර
දිනක් දෙඩුවා ඈ මෙහෙම
"අයියෙ දන්නවද පසන් කොඩිකාර?
මං හරිම ආදරේ ; ඒ අපේ සර් ය
පිස්සෙකු වාගේ අමුතු වූවාට
හරි හොඳ ය ආදරෙයි අප හට"

කී නිසා ඈ තව තවත් විස්තර
සොයා බැලුවෙමි ෆේස්බුක් පිටු අතර
දුටිමි පෙර දැක තිබූ මුත් මගහැරි
ඔහුගේ පාලු කාල රේඛාව

යවා මාගේ මිතුරු ඇරයුම
සතියකට පසු දිනෙක එළඹුන
අවදිවන්නට බෝ පමාවුණ
දහවලක මට ඇගෙන් පැමිණුන
කෙටිම කෙටි පණිවිඩෙකි ගොළු වුණ

"නැතිවෙලා මගෙ සර් අයියේ"
ඇගේ ඒ කෙටි බිඳුණු වැකියෙන්
ඇසූවෙමි යලි නොතේරුණු මම
කවුද නැතිවූයේ යි කියමින්
එහෙත් ඇගෙ ප්‍රති පණිවිඩෙට පෙර
ගුණේ ලියු සැර කවි පෙලක් දැක
වැටහුණෙමි ඇගෙ වචන මා හට

මගේ රික්වෙස්ටුව ද නොම දැක
බළල් ප්‍රේමියෙකු නික්ම ගොස් ඇත

"අනේ මට නං කවි ලියනු බැහැ"
කියා හැම තිස්සේම මතුරන
තවම ඇස කඳුලකින් තෙත් කල
ඇගේ ගුරු ගෞරවැති ප්‍රේමය
වෙනුවෙනුයි නාදුනන හිතවත
කිසිවක්ම නොම දන්න නුඹ ගැන
මගේ මේ කුරුටු ගෑ ලියමන


සහන් පද්මසංඛ පීරිස් | THЕ SAHAN 
2015 මාර්තු 26

2015/03/25

කමක් නෑ පිටවන්න - තුටින් බොරු අදහන්න


සියුමැලිය කිය කියා කෑගසා හතර කොණ
හිතෙහි පෙත්තක් ඇඟිලි තුඩු අගට රැගෙන එය
ලෙළවමින් සැමට මතුරමින් මගෙ නපුරු කම
ලියයි ඇය මහා කවි මවා කඳුළු තින්තය

මෙතෙක් මා ලඟම හිඳ හිතට හිතවතුන් වුණ
ඇතැම් බර මිතුදම් ද මගෙන් ඈතට වන්න
තරම් හරි හුරතල් වු ඇගේ විෂ පද වැල් ය
කමක් නෑ පිටවන්න තුටින් බොරු අදහන්න

මගේ හිත නම් හදින් වට කොටයි තබා ඇති
එනිසාම කිසිවෙකුට පහසුවෙන් පෙනෙන්නැති
සැබැවින්ම හදට ලංවූ අයට දකිනු හැකි
අමුතුවෙන් පෙති කඩා පෙන්වන්න ඕන නැති

සහන් පද්මසංඛ පීරිස් | THЕ SAHAN
2015 මාර්තු 25

2015/03/13

ඇය - මම

Sahan සහන්


හුදෙකලා ලැහැබක
තුරු පතින් මැකීගිය පිය මගක
නිහඬැතිවු එක්තරා අහම්බෙක
මගේ ඉදිරියට හදිසියේ හමුවන
පෙර නොදුටු නොම පුරුදු
නාදුනනා ඇය

දුඹුරුවැති දෙනෙතක
සහස් දෑ සංගතවැතැයි දැක
ඇගේ රුව සැණෙක පසු කරන තැන
පලමුවැනි සිතගින්ම බදා තදකොට
"පෙම් කරමි" කියා ඇය
සිප ගන්නා මම
_____________________________
සහන් පද්මසංඛ පීරිස් | THЕ SAHAN 
2015 මාර්තු 09

2015/03/04

පසුවදනක්



යන්නටම ඕනෑ ය කිව් විට
යන්න නොම දී ඉන්නෙ කුමකට ?
සිලිටි මල් හිත වියරු වූ මුදු
යන්න යැයි මම කීමි ඔබ හට

හරිම බර පෙමකට යටව තිබු  
හද නහර හැම එකම නපුරුව
දන්නෙ නෑ මම තවම අදට ද
සුළුපටු ද ඒ හැදුන වියරුව

ඉතින් හදගුළු විවර කරගෙන
සිතු ලෙසින් රෑනක සරන්නට
යතුර තැබුයේ නුඹේ සුරතෙහි
හිතින් නම් හෙම නොවේ ලබැඳිය

ගියා යයි මම සිතා සිටියෙමි
නමුදු නුඹෙ පා ලකුණු දුටුවෙමි
විටෙක මා පෙර වසඟ කෙරු නුඹෙ
සුවඳ සිහිනෙක තුලින් වින්දෙමි

කලක් ගත වුව නොසිතු ලෙස ඒ
නිමිති දැක හද රුධිර වැගිරුණි
නුඹ තවම නික්මී නොමැති බව
දැනී කටු තුඩු ඇනී රිදවුණි 

වසර දහයක වැසී තිබුනෙන්
අගුළු මල කා ඇති ද තද කර ?
හරිමි! නැහැ මම කඩමි හදගුලු
දොරත් ගලවා තබමි ගෙන වෙර

යන්න දැන් වත් මගෙ හදින් තව
රිදුම් නොම දී සිනහවෙන් බර
නුඹේ සුදු මුව මඬලෙ කඳුළැලි
මැකූ හද වෙත සදා කලටම
_____________________________
සහන් පද්මසංඛ පීරිස්​ | THЕ SAHAN​ 
2015 මාර්තු 04

2015/02/27

කට්ටාගේ සුවිසැරිය




ඇය සළු අඳින වේලේ කට මත සිටිමී
උදයෙම සැමට කලියෙන් ඇගෙ මුව සිඹිමී
කිසිවකු නොදුටු තැන් ඇගෙ දැක සසල වෙමී
දවසම දෙතන පහසට තුරුළුව නිදමී

දෙතනක සුවය විඳ විඳ සිටි මගේ සුර
සිහිනය බොඳකලා ඇය වී මවක තර
තනයෙන් ගලවලා බිළිඳුන් අඳින අර
ඇඳුමට ඇමිනුවා මා තෙමමින් නිතර

බිළිඳුගෙ පස්ස පැත්තට යට වී සිටිය
කාලය නිම උනා ගඳ ඉවසං බැරිය
පසුදා ගෙදර සැමියට අවනත වුණි ය
සිප් එක කැඩුණ කලිසමකට ඇමිනුණි ය

ඇමිණුනු වෙලේ සිට පැයකට දෙතුන් වරේ
වැසිකිලියට දුවයි මේකා සැරින් සැරේ
ගලවයි නමයි මට වද දී චූත් කරේ
මූටයි සීනි මූ එක්කම මාත් මැරේ

හවසත් බුවා යලි වැසිකිලියට ඇදුණා
ඒ බව දැනී මම හිමිහිට කෙලින් වුණා
එලියට ගන්න යද්දිම අරකේ ඇණුනා
රිදුණා ඌට මට පවු කියලත් හිතුණා

රෑ බෝ වුණා - නිවසේ විදුලිය නිවලා
"කටුවක් ඇණුනි අද බෑ ගෑණියෙ" කියලා
සැමියා ඇයට කී කට හඬ මට ඇහිලා
හිනැහුණු සැරට දන්නෙම නෑ මං වැටිලා

වැටුන තැනින් යලි මා අහුලා ගත්තේ
ලොකුම දුවයි ටයි පටියට ගහගත්තේ
ඇගෙ හුරුබුහුටි දෙතනට තද කර ගත්තේ
මවගේ ලැමට වැඩියෙන් මගෙ හිත ගත්තේ

උදයෙම අමුනගෙන පාසැල වෙත යන්නී
ඇගෙ යෙහෙලියන් හා කෙලියට යොමුවන්නී
ඒ අතරේ වරෙක වලියට බර වන්නී
දෙකකට නොවේ හතරකටම හිරවන්නී

දවසක් මොකද්දෝ වැඩකට මා ගලවා
ඩෙස් එක උඩින් අමතක කොට මා තැබුවා
තව කෙල්ලක පැමිණ මා අතමිට මොලවා
ඇගෙ නිවසට ගියා අරගෙන මා ඔසවා

ඇගෙ කාමරයෙ කොනකට කර මා ගැසුවා
කිරි සුදු සිරුර අඟලක හැර මා දුටුවා
පසුදින උදෑසන මගෙ කන කිති කැව්වා
ඇගෙ යට සායෙ බුරුලක ගැන ඈ දෙඩුවා

දැන් දැන් මගේ හොඳ කල එනු පෙනෙන්නේ
ඇගෙ මුදු ඇඟිලි මා සියොලඟ වෙලෙන්නේ
සියුමැලි අතින් යට සායේ ගසන්නේ
එහි ඇමිනිලා මුදු බඳ මා ඉඹින්නේ

සුවඳට ඇගේ මගෙ හද ඉවසුම් නැතුවා
යකඩින් කලත් මගෙ කටු හිත උණු කෙරුවා
දවසම ඇගේ පහසට මා මත් කෙරුවා
සතුටින් ඇගේ දහඩිය රසයත් බැලුවා
_____________________________
සහන් පද්මසංඛ පීරිස්​ | THЕ SAHAN​
2015 පෙබරවාරි 26

2015/02/25

පැතුම



ඔබේ උණුසුම් සොඳුරු හදවත
මගේ නම කිය කියා පෙර දින
ගැහි ගැහී හිනැහුනා මතකයි
දිනය එන තුරු මගෙන් වෙන් වුණ

සිදුරු කල හැකි වුණොත් එකවර
මහත් වූ සැනසුම් දේවි එය මට
ගැස්ම නිම වන මිනිත්තුව අග
වැරෙන් සිපගෙන නුඹේ දෙතොලග

ඔව් ඉතින් ඔබ සිතයි හනිකට
මගේ හිත තුළ වෛරයක් ගැන
ඒ වුණත් ඒ පැතුම හැම විට
අසමසම වුණ ප්‍රේමයක් ගැන
_____________________________
සහන් පද්මසංඛ පීරිස්​ | THЕ SAHAN​
2015 පෙබරවාරි 22

2015/02/22

ප්‍රේමයෙන් බේරූ හදක්



ප්‍රේමයක් සිරව නතරවුන
හදවතක් ගෙනියන්න විගහට
ඉස්පිරිතාල හිතකට!

ඡේදනය කර බලා විනිවිද
සිරව ඇති ප්‍රේමයේ යගුලිය
හොයාගෙන එය ගන්න එලියට!

අහම්බෙන් වත්
හැකි වුවොත් ඔබ හට
නැවත එහි ගැස්මක් මවන්නට,

සුවවනාතුරු පරිස්සම් කර
යලිත් විසිකරලන්න ලෝකෙට!

ප්‍රේමයක් සිරව නතරවුන
හදවතක් බේරගත් විට
නැවත ඖෂධ අවශ්‍යම නැත!
පළල් වුන ඒ නහර ඇතුලත
නැවත ප්‍රේමයක් කිසිදාක
සිර වන්නේ ද නැත!
__________________________
සහන් පද්මසංඛ පීරිස්​ | THЕ SAHAN​
2015 පෙබරවාරි 21

2015/02/21

කුණු ගොඩකි මෙය



බලන් මසොඳුර
පෙර බොහෝ සිඟන්නියන් පැමිණ
අවුස්සා ගිය
ඇවිස්සී ඇති
කුණු ගොඩකි මෙය..

ඔවුනට අවැසි දෑ රැගෙන
අනැවසි දෑ නොගෙන
ඔවුන් ලඟ වූ
කුණු ද විසි කර
අවුස්සා ගිය
ඇවිස්සී ඇති
කුණු ගොඩකි මෙය..

අයෙකුට දැකිය හැකි වුව
කිසිවෙකු නොදුටු තව
නේක වර්ණැති
රටා සපිරුණ
අවුස්සා ගිය
ඇවිස්සී ඇති
කුණු ගොඩකි මෙය..

බලන් මසොඳුර
හොඳින් ලංවී
ඒ රටාවන්
නුඹට හෝ පෙනේවි ද?
දුටුවහොත් අහම්බෙක වත් නුඹ
තව තවත් අවුස්සා බලනු මැන!

නුඹ වශී වන
නුඹට නොපෙණුන
විශ්මයැති වර්ණයෙන් නිමැවුණ
රටාවන් පිරි
අවුස්සා ගිය
ඇවිස්සී ඇති
කුණු ගොඩකි මෙය..
___________________________
සහන් පද්මසංඛ පීරිස්​ | THЕ SAHAN​
2015 පෙබරවාරි 21

2015/02/17

ඉබේ ගලනා මහ ගගක්



ඔබ තුලත් ඇත්තේය
ඉබේ ගලනා මහ ගඟක්

ඔබේ යයි කී නමුදු
ඔබට අවනත නොමැති
ඉබේ ගලනා මහ ගඟක්

කියයි ඔබ ඔබෙ හිතවතුන් හට
මෙසේ බර ස්වරයකින් උඩඟුව
"දිරිය ගෙන උත්සහය ගෙන නෙක
කුසල කර අකුසලෙන් වැලකුන
දුටූවෙද මා හැරවු විස්කම
ඉබේ ගලනා මහ ගඟක්"

ඔබ එසේ මතුරාවි
හමුවනා හැමෙකෙකුට
නමුදු ගඟ හරවන්න
කෙදින හෝ බැහැ ඔබට

විටෙක සරු වනබිමක
තව විටෙක මුඩුබිමක
නුඹව රවටා ගලන
ගඟෙහි නියමුනාණන්
ගඟම බව දැනගන්න

කිම ද එය
ඔබේ යයි කී නමුදු
ඔබට අවනත නොමැති
ඉබේ ගලනා මහ ගඟක්
සහන් පද්මසංඛ පීරිස්
(THЕ SAHAN)​
2015 පෙබරවාරි 17

2015/02/15

නරියෙකුට පුලුවන් ද ගන්න ප්‍රේමයෙ පාට


නරියෙකුට පුලුවන් ද
ගන්න ප්‍රේමයෙ පාට?
දෙන්න ප්‍රේමයේ ඇති
හරි පාට?

මොහොතකට
විමසන්ට

ආදරේ දැණුන විට
හුරතලෙන් ලං වෙනා
උණුහුමැති හොම්බෙ ඇති
කලු පාට

හිත සතුට වැඩිකමට
උල් දතක් පෙන්නලා
හුරතලෙන් හිනැහෙනා
හැම රෑට

සොවක් දැණුනොත් ඊට
හොඳින් සරිලන මූණ
මවාගෙන ඉකිලනා
දුක පාට

වැඩත් කරනා විටෙක
නැහැදිච්ච
එහෙත් කොයි වෙලෙත් පෙම
තැවරිච්ච
නරියෙකුට පුලුවන් ද
ගන්න ප්‍රේමයෙ පාට?
දෙන්න ප්‍රේමයේ ඇති
හරි පාට?

ඔව් හැකිය
ඒ තමයි බිස්කට්ගෙ
දඟ පාට

සහන් පද්මසංඛ පීරිස්
(THЕ SAHAN​)
2015 පෙබරවාරි 15

2015/02/14

ආදරේ ලස්සන ද හැමදාම?


දියට පැන සියදිවි හානි කර ගත්
නවයොවුන් පෙම් යුවලක් පිළිබඳ
ඇසීමෙන් පසු ඔහේ ලියවුණි.

කවදාත් ඉක්මන්ය
අපේ කලබල වීම
එහෙත් මේ හදිසි තීරණය
අවසාන එකම ය
කොයි තරම් සැනසුම් ද
මුල් ටික හුඟක් රිදුණාට

පුයර තවරා සිනිදු කෙරුවාට
වටට පෙනෙනට හැඩට
ආදරේ ලස්සන ද හැමදාම?
පැලුම් පිපිරුම් හොරෙන් වැහුවාම
නොරිදේ ද හිතක් ඉරිතැලුවාම?

එකතු විය මහ ගොඩක් හරි බරට
ඇයට මට හැර කාට
නොපෙනෙනා කඳුළු දිය හිත මැදට
පිට නොවන ලෙස වාන වැහුවාම
ගිලෙන එක හුරු වුණේ පෙරදාම

ආදරේ සමරලා එක දිනෙක
සටනකින් පැරදිලා පසු දිනෙක
නැතොත් සටනකුත් නැති හිස් හිතක
හැර යාම වාගේ ද - හැමදාම
අපව එක්කල අපේ හැර යාම

නොහඳුනන අය නොදන්නා අය
ගසන කෙල පිඬු, ලියන සහතික 
ඔව් ඉතින් ඔබ සැවොම එක ලෙස
කිරිසුදුයි පිරිසිදුයි - අප හැර

කමක් නෑ ගරහන්න
නැති දේත් පතුරන්න
අද උදෙන් නැගිටලා
ආදරෙත් සමරන්න
යලි පහුවදා ඇවිත්
හුරු ලෙසින් ගරහන්න

ඔබ කුමක් දුටූව ද
ඔබ කුමක් සිතූව ද
ඔබ කුමක් කියූව ද
ඔබ කුමක් ලියූව ද
මේ හදිසි තීරණය
අවසාන එකම ය
කොයි තරම් සැනසුම් ද
මුල් ටික හුඟක් රිදුණාට


සහන් පද්මසංඛ පීරිස්
(THE SAHAN)
2015 පෙබරවාරි 14

2015/02/04

උත්ථානය


වසා හිඳ සුරඟනක සුර දෙපා මත මුතූ
වසා සිටි සුර පයකටම පෑගිලා, පැතූ
වවුල් තෙම මිය ගියා සියක් පෙම් කවි ගෙතූ

සොබාදම පවා ඒ මරණයට සසැලුනා
වවුල් තෙම මරණයට නොකැප බව මිමිණුනා
මැවූ නිල් තරු රැසින් වවුල් බව ගිලිහුණා
පෙමින් සැදි බළල් හද උත්ථාන කරවුණා
සහන් පද්මසංඛ පීරිස්​
( THЕ SAHAN​ )
2015 පෙබරවාරි 04

2015/02/03

මෙරිගො රවුම










අප දෙදෙනා දිගින් දිගට
නතර නොකර සිටි පැද පැද
අඳුරු පාට මෙරිගො රවුම
යලිත් නොපැද ඉන්නයි මම
විකිණූයේ පරණ යකඩ
එකතු කරන මහල්ලෙකුට
ගලවාගෙන අරන් ගොසින්
ගොඩ ගහලා තියාගන්න

නුඹට ඕනි නම් විගහට
ඔහුගෙන් එය ඉල්ල ගන්න
ඉල්ලාගෙන අරන් ගොසින්
සවි කරලා තියාගන්න
හැබැයි මෙමට හඬ නොගසා
තනියම එහි ඉඳං ඉන්න
පාලුම නං හිත මිතුරෙක්
අඬගහගෙන පැදන් යන්න
සහන් පද්මසංඛ පීරිස්
THE SAHAN
2015 පෙබරවාරි 03

2015/02/02

මල් යායකි - නුඹේ හිත ඇතුලැති










දනිමි, මල් යායකි
නුඹේ හිත ඇතුලැති..

කාෂ්ඨක නියඟයට
මැලවුවත් මැරුන්නැති..
ගැලූ ගං වතුරට ද
යට වුවත් තැලුන්නැති..

සුපිපි මල් යායකි
නුඹේ හිත ඇතුලැති..

සිරි අසිරි බැලුමට ද
රැකබලා ගැනුමට ද
මල් හිතට ඉහලතින්
අහස වී හිඳිනෙමි..

නැවත යට නොවන්නට
ගං වතුර නොඑන්නට
නමුදු මල් දරන්නට
වැසි ද වී හැලෙනෙමි..

සුවඳ මල් යායකි
නුඹේ හිත ඇතුලැති..

අන් බිඟුන් එලවාපු
කෙම් කවක් මුමුණාපු
පෙම් පඳුරු දළුලාපු
මටම හැඩ පෙන්නාපු

අරුම මල් යායකි
නුඹේ හිත ඇතුලැති..

සහන් පද්මසංඛ පීරිස්
( THЕ SAHAN )
2015 පෙබරවාරි 02

2015/01/31

විල් තෙර ළදැරිය











උමතු බව පුරවාපූ හද විලක් තියෙනවා
ඉවුර මත ළදැරියක කවි පොතක් ලියනවා
විලට වැටි එකවි මිණි තරු ගොඩක් මවනවා
එකතු වුණ තරු රටා සිතු පෙමක් අඳිනවා

ඇයගෙ හද විල් දියර බිව් සොරෙකු හිඳිනවා
සොරුන් හට නපුරු මුත් ඔහුට ඇය බැඳෙනවා
අරුම ඇගෙ හැරුම දැක ලොවම ගල් ගැහෙනවා
සියලු දොස් අසන ඇය රැහැණ තද කරනවා

සොරු ද විල් තෙර සැඟව ඇය දෙසම බලනවා
දරණු බැරි මොහොතකදි උස් හඬින ගයනවා
ගිටාරෙක වැයුම විල් දියෙහි දිය කරනවා
කල එකම හොරකමම සතුට කර විඳිනවා

ඉඳහිටෙක විල් තලය මිහිදුමක ගිලෙනවා
ළදැරි හනිකට එවිට දැහැනකට වදිනවා
ගිණි ගලක නොවෙයි නෙතු මැද පුළිඟු හදනවා
එකම එක බැල්මකට මිහිදුමම මකනවා

කවි ලියා වෙහෙස වුණු විටෙක ඇය නිදනවා
ලඟ නැතත් සොරු සිටින සුබ සිහින දකිනවා 
සිහිනයෙම හිඳ මුහුණ සිපගන්න පතනවා
ලඟම දිනයෙක සිහින ජය ගන්න හිතනවා

සහන් පද්මසංඛ පීරිස්
(THЕ SAHAN)
2015 ජනවාරි 31

2015/01/22

පස් වසකට පසු


අදයි ඒ ලොකු දවස
මුල් ඇදන් අතු විදන්
ජනවාරි මැද්දෑවෙ
පැලවිච්ච..

අතීතෙට මහ ගොඩක්
සුබ වෙච්ච..
වත්මනට කඳුළු වැහි
බර වෙච්ච..
අනාවට හිස්කමක්
පිරවිච්ච..
පෙමක් මුලු ලොවක් කොට
ඉපදිච්ච..
ලොවක අත් වලින් ගෙල
මිරිකිච්ච..
මියෙන්නට පෙර පසට
යට වෙච්ච..

නුඹ මගේ ප්‍රේමයේ
අඳුරු සංවත්සරය,
කැලැන්ඩර පහක අළු
තැවරිච්ච..

නුඹේ මුදු සිලිටි හිත
ගල් වෙච්ච,
විසක් කැවුනි ද මගෙන්
සැඟවිච්ච?
දිනට පෙර නුඹ මගෙන්
නික්මිච්ච..
නුඹට පෙන්නන්නටම
ලියවිච්ච..
කවිත් තියෙනව තවම,
නුඹට පෙන්නාගන්න
බැරිවිච්ච..
ඇතැම්වා පෙන්නුවත් 
නොපෙනිච්ච..

අපේ ලොව සියලු දෑ
මේ ලෙසින් වන අතර
සමන්තර විශ්වයක
ප්‍රේමයෙන් උමතු වී
ඉපිලිච්ච..
කාලයේ නීති බිඳ
හද ගැසුම් නතර කල
උයන් මැද සිපගැනුම්
ඉතිරිච්ච..
පෙම් සිතින් මවාගත්
දියණියත් තුරුළු කොට
පිය සෙනෙන් මව් සෙනෙන්
හිනැහිච්ච..
සහන් සහ නදීරා
තවම ඇත වියෝවක්
නොදැනිච්ච..

සහන් පද්මසංඛ පීරිස්
(THЕ SAHAN)
2015 ජනවාරි 22

2015/01/21

ළඳකට හැකිය මෙසියලු දෑ කරවන්න









නෙතගින් රැගෙන මුවහත‍, ගෙල සිඳලන්න
ඇඟ ලේ දුවන මුත් පස යට වලලන්න
ජීවන බඳුණෙ මරණයෙ මධු පුරවන්න
ළඳකට හැකිය මෙසියලු දෑ කරවන්න

හිරු රැස් පවා ශීතල කොට මුදවන්න
සඳ රැස් රැහැන් ගණ අඳුරෙහි බැඳලන්න
නොපෙනෙන අඟුරු හද වටකර අතුරන්න
ළඳකට හැකිය හිතකට ගිණි අවුලන්න

සුළඟක උලැති ඉදිකටු තුඩු අමුණන්න
හුස්මක දියව පෙනහලු හිර කරවන්න
යලි යලි පැමිණ මතකයෙ අළු විසුලන්න
ළඳකට හැකිය සොහොනක හිත සඟවන්න

ජීවිත පොතෙහි පිටු එකිනෙක ගලවන්න
තව එක විටෙක ඇය ලියු පිටු අලවන්න
මැකුමට නොහැකි පැහැ සිතුවම් තවරන්න 
ළඳකට හැකිය කාලය දිගු කරවන්න

සහන් පද්මසංඛ පීරිස්
(THЕ SAHAN)
2015 ජනවාරි 21

2015/01/18

නෞකාවේ ගීතය


"අතැර දැමූ එක නෞකාවකි ඔබ"
මගේම හදවත මට කියනා
මොහොතින් මොහොතට සැඩ රළ පහරට
කෑලි කැඩී විසිරී බිඳෙනා
රුවල් ඉරී සුළඟේ ලෙලෙනා

ගිලෙනා බැව් දැන හැම ඉක්මන් කර
පිට වුණු දිනේ පටන්
මතකයෙ ඇඳි බොඳ සිතුවම් පමණකි
තනියට හිටියෙ ලඟින්

ළිහිණි හඬින් රිදවුම් අමතක කර
හැකි ලෙස ඇදෙමි වෙරෙන්
අවසන් තොටුපල ලංවනු කලියෙන්
ගිලෙනට නොරිසි බැවින්

සහන් පද්මසංඛ පීරිස්
( THE SAHAN )
2015 ජනවාරි 18

2015/01/14

නුඹම ය


විශ්වය මැවූ නුඹම ය
එහි පෙම සැදූ නුඹම ය
මා හද මැවූ නුඹම ය
තැබුවේ පෙමෙහි පතුලෙ ය

සාගර ජලෙත් නුඹෙම ය
පෙම දිය කලෙත් නුඹම ය
කඳුළක රසත් එයම ය
එහි හිමිකමත් නුඹෙම ය

සඳ රැස් නුඹේ සිනහ ය
තරු රැස් නුඹේ දෙනෙත ය
අහසම නුඹේ වසඟෙ ය
හිරු රැස් නුඹේ සෙනෙහෙ ය

සුවිසෙස් බවෙක මහිමය
මෙසියලු අරුම පෑම ය
එහැමට කරුණ නුඹම ය
නුඹ නම් සොඳුර මගෙමය

සහන් පද්මසංඛ පීරිස්
( THЕ SAHAN )
2015 ජනවාරි 14

Picture - from here

2015/01/07

අපපූස්


පැත්ත පලාතම හොල්ලං ඉන්න දාමරික කලුපූස්ගේ ආසන්නතම ප්‍රහාරයකින්, අපපූස්ගේ වම් කම්මුලෙහි සැලකිය නොයුතු තරම් පුංචි තුවාලයක් ඇති වුනේ මීට මාස කිහිපයකට කලින්! උපතේ සිටම බාහිර පූසන්ගෙන් කෙතරම් බලපෑම් ආව ද, අපපූස් ප්‍රතිප්‍රහාරයන්ට යොමු නොවී ගුටි කෑම හෝ දුවා ගොස් සැඟවීම පමණක් සිදු කලේ අහිංසකකම නිසා ද බියගුලුකම නිසා ද කියා අපට තේරුණේ නෑ! කෙසේ වෙතත්, අපපූස්ට අතිශයින් ආදරය කල මාගේ බලතල භාවිත කරමින්, කලුපූස්ට එරෙහිව උපරිම බලය යොදා ගැනීමට මා තීරණය කලා!

ඉන්පසු, නිවසෙහි දොරකඩෙහි එක්රැස් කරන ලද ගල් කිහිපයක් නිරන්තරයෙන් දක්නට ලැබුණා! ගල් ප්‍රහාර හමුවේ ද කලුපූස්ගේ ආක්‍රමණ සැලකිය යුතු ලෙස අඩු වුණේ නැහැ. විශේෂයෙන් රාත්‍රී කාලයේ දියත් වුණු නිවෙස තුලටම විත් සිදු කෙරුණු ගරිල්ලා ප්‍රහාර නතර වූයේ නැහැ. නමුත්, කලුපූස් විරෝධී මෙහෙයුමේ තීරණාත්මක සංධිස්ථානයක් සනිටුහන් කරමින්, එක්තරා දිනෙක දියත් කෙරුණු ගරිල්ලා ප්‍රහාරයක් අතරතුර දී කලුපූස්ට වැඩ වැරදුණා! නිවෙස තුලට පැමිණි කලුපූස්ට, නිවසින් පිටවිය නොහැකි වන ලෙස, ඌ පැමිණි ජනේලය වසා දමා ඉතා දරුණු ප්‍රහාර මාලාවකින් සංග්‍රහ කිරීමට මා සමත් වුණා! ඒ සියළු ප්‍රහාර, අපපූස් බලා සිටියේ කැබිනට්ටුව යට සැඟවීගෙනයි! ප්‍රහාරය අවසන, ගරිල්ලා සටනෙහි ඇති තම මනා හැකියාවන් භාවිත කරමින්, බොහෝ උසකින් තිබූ කව්ලුවකට නැග පලා යාමට කලුපූස්ට හැකි වූවා! එම ප්‍රහාරයෙහි ප්‍රමුඛතම ආයුධය වූ අම්මා ගේ අතුගානා කොස්ස, නැවත භාවිත කල නොහැකි පරිදි විනාශ වූ බව ද කිව යුතුයි!

එම තීරණාත්මක රාත්‍රියෙන් පසු අපපූස් හට කලුපූස්ගෙන් තිබූ කරදර සැලකිය යුතු ලෙස අඩු වුණා! අපපූස් සතුටින් ජීවත් වුණා! තමා මෙතෙක් කල් බිය වී සිටි කලුපූස් උවදුර පහවයාමත් සමඟ තමාට ලැබුණු නිදහස සහ ප්‍රාදේශික බලය, අපපූස් සති කිහිපයකින් ප්‍රදර්ශණය කර පෙන්වූවා! එහි පළමු පියවර වූයේ, මෙතෙක් තම මිතුරෙකු වූ, පෙර කල තමා මෙන්ම කලුපූස්ගෙන් බැට කෑ, එහා ගෙදර මෝඩපූස් සමඟ යුද්ධ ප්‍රකාශ කිරීමයි! උපතේ සිටම අවිහිංසකත්වය ප්‍රදර්ශණය කල අපපූස්, සති කිහිපයක් ගත වෙද්දී, සිරුරටත් වඩා නැට්ට පුම්බා ගෙරවීමටත්, මෝඩපූස් අප වත්තට ඇතුලුවන වේලාවල් බලා රැක සිට පෙරළාගෙන පහර දීමටත් පටන් ගත්තා! ලැබුණු බලයත්, නිදහසත්, අපපූස් විසින් අනිසි ලෙස භාවිත කරන බව අපට හැඟුණත්, අපපූස්ට තිබූ ආදරයක්, අපපූස් අප සමඟ පානා හුරතලයත් නිසා, අප මෝඩපූස් කෙරෙහි සංවේදී වූයේ නැහැ! "දැන් කලුපූස් නෑනේ! ඒක නිසා අපේපූස් චණ්ඩියා උනාම මොකද!" අන්න එහෙමයි අපේ කටවල් වලින් කියැවුනේ!

මෙසේ තවත් කලක් ගත වෙද්දී, තම ආරක්ෂාව ද, තමා කෙරෙහි දක්වන සැලකිල්ල ද, කලුපූස් උවදුර තිබූ සමයේ තරම් නොමැති බව, අපපූස්ට තේරුණා! එයට විකල්පයක් ලෙස, අපපූස් යොදාගත් උපාය මාර්ගය වූයේ, සුව වෙමින් තිබූ කම්මුලෙහි තුවාලය, තම පස්සා කකුලේ නියපොතු යොදාගෙන ඩිංගිත්තක් පාරාගැනීමයි! මුල් කාලයේදී අප මෙය නොදැන, නැවතත් කලුපූස්ට චෝදනා කරන්නට වූවා! කලුපූස් උවදුර නැවත හිස ඔසවන බවට වූ සිතිවිල්ල අපේ සිත් සතන් වල ඇඳී ගියා! අප නොමැති වේලාවක, කලුපූස් නැවතත් පැමිණ පහර දී කම්මුල තුවාල කරන්නට ඇතැයි අප උපකල්පනය කලා! නැවතත් අපපූස් වටා ආරක්ෂාව තර කෙරුණා! සැලකිල්ල ද වැඩි කෙරුණා! එම සැලකිල්ල සහ ආරක්ෂාව මධ්‍යයේ මෝඩපූස්ට එරෙහි ප්‍රහාර ද දිගින් දිගටම සිදු කෙරුණා!

එහෙත්, මෙවන් දැඩි ආරක්ෂාවක් යටතේ වුව, කම්මුලේ තුවාලය සුව වන බවක් පෙණුනේ නැහැ! දිනෙන් දින එය තව දුරටත් වැඩි වුණා! මිලිමීටර් කිහිපයක තුවාලයක් වූ එය, අඟල් කිහිපයක් දක්වා පැතිරුණා! එය දකිද්දී, අපපූස් කෙරෙහි අනුකම්පාව සහ සැලකිල්ල තවදුරටත් වැඩි කරවන්නත්, කලුපූස් කෙරෙහි අප සිත් තුල වූ වෛරය යලි යලිත් වැඩෙන්නටත් වූවා! නමුත්, කල් ගතවී හෝ සිදුවන දේ තේරුම් ගැනීමට අපට හැකි වුණා! පස්සා කකුල යොදාගනිමින් තුවාලය පාරාගන්නා බවත්, වේදනාව විඳගෙන හෝ, තව දුරටත් එහි වපසරිය වර්ධනය කරගැනීමට අපපූස් බලාපොරොත්තුවෙන් සිටින බවත් අපට තේරුම් ගියා! තවත් මෙය බලා සිටියහොත්, අපට නැති වෙන්නේ අපපූස්ම බවත් අපට තේරුම් ගියා! අපපූස් අහිමි වුවහොත්, එය නිවසේ සතුටට දරුණු බලපෑමක් එල්ල කරන්නක් වන බව අපට තේරුම් ගියා!

ඉතින් අපි තීරණයක් ගත්තා! එක්කෝ අපි හෙට අපපූස්ගේ නියපොතු ටික කපා දානවා! නැතහොත්, අපි, අපපූස්ව මීලඟ පූසාධිපතිවරණයේ අපේක්ෂකයෙකු ලෙස ඉදිරිපත් කරනවා!

(සත්‍ය සිදුවීමක් ඇසුරෙනි)

සහන් පද්මසංඛ පීරිස් | THЕ SAHAN
2015 ජනවාරි 07